سفید پوش طبقہ لاک ڈائون کے باعث مشکلات کا شکار ہے ،گورنرسندھ

راشن کی فراہمی اور یوٹیلیٹی بلوں میں سہولت دینے کے لئے اقدامات کی ضرورت ہے،مخیر حضرات کی جانب سے راشن اور مالی مدد کی فراہمی سے ان کی مشکلات کو کم کرنے میں مدد ملے گی، عمران اسماعیل کی مخیر حضرات سے گفتگو

منگل 7 اپریل 2020 21:37

سفید پوش طبقہ لاک ڈائون کے باعث مشکلات کا شکار ہے ،گورنرسندھ
کراچی (اُردو پوائنٹ اخبارتازہ ترین - این این آئی۔ 07 اپریل2020ء) گورنر سندھ عمران اسماعیل نے کہا ہے کہ سفید پوش طبقہ لاک ڈائون کے باعث بہت زیادہ مشکلات کا شکار ہے اس لئے انہیں راشن کی فراہمی اور یوٹیلیٹی بلوں میں آسانی کے لئے بھرپور اقدامات کی ضرورت ہے، مخیر حضرات کی جانب سے راشن اور مالی مدد کی فراہمی سے ان کی مشکلات کو کم کرنے میں مدد ملے گی۔

ان خیالات کا اظہار انہوں نے شہر کے مخیر حضرات کے وفد سے ملاقات کے دوران گفتگو کرتے ہوئے کیا۔ رکن سندھ اسمبلی حلیم عادل شیخ اور گورنر سندھ کے مشیر امید علی جونیجو بھی اس موقع پر موجود تھے جبکہ وفد میں حاجی اقبال، محسن پردیسی اور طارق قریشی شامل تھے۔ ملاقات کے دوران کورونا سے بچائو کی احتیاطی تدابیر، لاک ڈائون کا شکار افرد میں راشن کی تقسیم ، خصوصاً سفید پوش گھرانوں کی دشواریوں، ان کے یوٹیلیٹی بلوں میں رعایت دینے اور باہمی دلچسپی کے امور پر تبادلہ خیال کیا گیا۔

(جاری ہے)

گورنر سندھ نے کہا کہ یہ نہایت خوش آئند بات ہے کہ کوروناکے خلاف جنگ میں ہر طبقہ اپنی بساط کے مطابق کردار ادا کررہا ہے جوکہ ایک متحد قوم ہونے کا ثبوت ہے۔ انہوں نے کہا کہ وفاقی و صوبائی حکومتیں مل کر کورونا وائرس کے خلاف جنگ لڑرہی ہیں جبکہ لاک ڈائون کا مقصد اس وائرس کو پھیلنے سے روکنا ہے۔ گورنر سندھ نے کہا کہ کے الیکٹرک کی جانب سے کم بجلی استعمال کرنے والے صارفین کو ادائیگی میں سہولت دینے سے غریب اور سفید پوش افراد کو فائدہ ہوگا۔

گورنر سندھ نے راشن کی تقسیم میں دوکانداروں اور تاجروں کو شامل کرنے کی تجویز کو سراہتے ہوئے کہا کہ اس سے مثبت نتائج نکلیں گے۔ گورنرسندھ نے کہا کہ عوامی نمائندے مستحق افراد کی نشاندہی اور انہیں راشن کی فراہمی میں نمایاں کردار ادا کرسکتے ہیں کیونکہ یہ اپنے حلقہ کے عوام سے براہِ راست رابطہ میں ہوتے ہیں۔ حاجی اقبال نے گورنر سندھ کو بتایا کہ دبئی اسلامک بینک، کے الیکٹرک اور کول اینڈ کول کے تعاون سے مستحق افراد کو راشن اور مالی امداد دیں گے۔ انہوں نے مزید کہا کہ شہر کے مخیر حضرات ہمارے ساتھ ہیں، مل کر لاک ڈائون کا شکار افراد کی مدد کریں گے کیونکہ یہ ہماری قومی ذمہ داری ہے۔