حکومت کے نوٹیفکیشن سے اقلیتی کمیشن قیام سے قبل ہی متنازع ہوگیا، رضا ربانی

ْقومی کونسل برائے اقلیت کی نمائندگی کا نوٹیفکیشن عدالتی فیصلے کی خلاف ورزی ہے،پی پی رہنما

جمعہ 8 مئی 2020 23:41

اسلام آباد (اُردو پوائنٹ اخبارتازہ ترین - این این آئی۔ 08 مئی2020ء) سابق چیئرمین سینیٹ وپیپلزپارٹی کے رہنما میاں رضا ربانی نے کہا ہے کہ وفاقی حکومت کے نوٹیفکیشن سے قومی اقلیتی کمیشن قیام سے قبل ہی متنازع ہوگیا۔ ایک بیان میں پی پی رہنما رضا ربانی نے کہا کہ وزارت مذہبی امور کی جانب سے قومی کمیشن برائے اقلیت کے قیام کا نوٹیفکیشن سپریم کورٹ کے فیصلے کی خلاف ورزی ہے۔

(جاری ہے)

انہوں نے کہا کہ سابق چیف جسٹس تصدق جیلانی نے پشاور چرچ دھماکے کے بعد فیصلہ سنایا تھا اور اٴْس فیصلے کے مطابق قومی کمیشن برائے اقلیت کا قیام عمل میں آنا تھا۔رضا ربانی نے کہا کہ وفاقی حکومت نے کابینہ کی مرضی سے قومی کمیشن برائے اقلیت کا نوٹیفکیشن جاری کیا لیکن سپریم کورٹ کے فیصلے پر عملدرآمد نہیں کرایا گیا۔انہوںنے کہاکہ وفاقی حکومت کے نوٹیفکیشن سے کمیشن قیام سے قبل ہی متنازع ہوگیا، اس کے باعث وزارت مذہبی امور کو سمری میں ترمیم کرنا پڑی لہٰذا قومی کمیشن برائے اقلیت کا قیام پارلیمنٹ کے ایکٹ کے تحت کیاجائے۔