غیر متعلقہ فورم پر رابطہ کرکے حکومت نے محنت پرپانی پھیر دیا، فوزیہ صدیقی

کراچی (اُردو پوائنٹ اخبارتازہ ترین - این این آئی۔ 21 مئی2020ء) ڈاکٹر عافیہ صدیقی کی بہن فوزیہ صدیقی نے کہا ہے کہ ہم کروڑوں روپے امریکا میں وکلا کو ادا کرتے رہے، وفاقی حکومت نے عافیہ سے متعلق غیر متعلقہ فورم پر رابطہ کرکے محنت پرپانی پھیر دیا۔سندھ ہائیکورٹ میں جسٹس محمد علی مظہر نے امریکا میں قید ڈاکٹر عافیہ صدیقی کی وطن واپسی سے متعلق ان کہ بہن فوزیہ صدیقی کی جانب سے دائر درخواست کی سماعت کی ۔

درخواست کی سماعت میں سندھ ہائیکورٹ نے وفاقی حکومت سے پیش رفت رپورٹ طلب کرتے ہوئے درخواست گزار سے رحم کی اپیل کا طریقہ کار بھی طلب کرلیا جبکہ عدالت نے ڈپٹی اٹارنی جنرل کو پیش رفت رپورٹ سے عافیہ صدیقی کے اہلخانہ کو آگاہ کرنے کی بھی ہدایت کی ہے۔کیس کی سماعت کے دوران درخواست گزار فوزیہ صدیقی نے عدالت کو بتایا کہ وفاقی حکومت نے عافیہ صدیقی سے متعلق غیر متعلقہ فورم پر رابطہ کیا ہے، وفاقی حکومت کہہ رہی ہے کہ عافیہ صدیقی خود بات نہیں کرنا چاہتی۔

(جاری ہے)

فوزیہ صدیقی کا موقف تھا کہ کیا ایک ماں اپنی اولاد کے ساتھ بات نہیں کرے گی ، ہم کروڑوں روپے امریکا میں وکلا کو ادا کرتے رہے، حکومت نے محنت پرپانی پھیر دیا۔وفاقی حکومت جو کچھ بھی کررہی ہے کم سے کم ہمیں اس کی اطلاع دے، غلط فورم پر رابطہ کرنے سے وفاق کی درخواست غیر موثر ہوگئی ہے۔فوزیہ صدیقی نے بتایا کہ عافیہ صدیقی جس جیل میں ہے وہاں 600 قیدی کورونا سے انتقال کرچکے ہیں،عافیہ کی جان کو خطرہ ہے، حکومت کچھ نہیں کررہی۔عدالت نے سماعت کے دوران ریمارکس دیئے کہ وفاق جو بھی کوششیں کر رہا ہے درخواست گزار کو آگاہ کرتے رہیں۔واضح رہے کہ فوزیہ صدیقی نے بہن عافیہ صدیقی کی واپسی کے لیے سندھ ہائیکورٹ میں درخواست دائر کررکھی ہے۔