کشمیریوں نے عید قید تنہائی میں گزاری،مشال ملک

بھارت کرونا وائرس کی آڑ میں بلیک آؤٹ کر کے کشمیریوں کا قتل عام کر رہا ہے، بیان

بدھ 27 مئی 2020 17:56

اسلام آباد (اُردو پوائنٹ اخبارتازہ ترین - این این آئی۔ 27 مئی2020ء) کشمیری حریت رہنما یاسین ملک کی اہلیہ مشال ملک کا کہنا ہے کہ کشمیریوں نے عید قید تنہائی میں گزاری ہے، بھارت کرونا وائرس کی آڑ میں بلیک آؤٹ کر کے کشمیریوں کا قتل عام کر رہا ہے۔اپنے بیان میں کشمیری حریت رہنما یاسین ملک کی اہلیہ مشال ملک نے کہا کہ مقبوضہ کشمیر کی موجودہ صورتحال پر شدید تشویش لاحق ہے، بھارت کرونا وائرس کی آڑ میں بلیک آؤٹ کر کے کشمیریوں کا قتل عام کر رہا ہے۔

(جاری ہے)

مشال ملک نے کہا کہ کشمیر میں لاک ڈاؤن کے باعث خوراک کی شدید قلت ہے، یاسین ملک سمیت قید حریت رہنماؤں کی زندگی کو خطرات ہیں۔ مقبوضہ کشمیر میں کرونا مریضوں کو کوئی سہولت فراہم نہیں کی جارہی۔انہوں نے کہا کہ کئی مہینوں سے لاک ڈاؤن نے کشمیریوں کی زندگی اجیرن کردی، بھارتی فورسز ظلم اور لاک ڈاؤن سے کشمیریوں کو نفسیاتی مریض بنا رہی ہے۔مشال ملک نے کہا کہ کشمیریوں کی جدوجہد ظلم و ستم اور جبر کے باوجود بھی جاری ہے، مودی حکومت مسلم دشمن ایجنڈے پر عمل پیرا ہے۔ کشمیریوں نے عید قید تنہائی میں گزاری۔ عالمی ادارہ صحت مقبوضہ کشمیر میں صحت سہولیات کا جائزہ لے۔