مشہور سربیئن فٹبالر نے خود کشی کرلی

38 سالہ میلیان مرداکووِچ نے سر میں گولی مار کر خود کشی کی ،کچھ عرصے سے ذہنی دباؤ اور پریشانیوں میں مبتلا تھے

Zeeshan Mehtab ذیشان مہتاب جمعرات 28 مئی 2020 16:26

مشہور سربیئن فٹبالر نے خود کشی کرلی
بلغراد (اردو پوائنٹ تازہ ترین اخبار۔28مئی 2020ء ) سربیا کے ایک مشہور فٹبالر نے ڈپریشن سے تنگ آ کر خودکشی کرلی۔ غیر ملکی میڈیا کے مطابق سربیا کے 38 سالہ فٹبال کھلاڑی میلیان مرداکووِچ نے اپنے سر میں گولی مار کر خود کشی کر لی ہے، وہ کچھ عرصے سے ذہنی دباؤ اور پریشانیوں میں مبتلا تھے۔ متعدد فٹبال کلبز کی جانب سے کھیلنے والے ریٹائرڈ معروف سٹرائیکر بلغراد کے اپارٹمنٹ میں مردہ پائے گئے تھے، ان کی دوست کا کہنا تھا کہ میلیان نے بہت زیادہ شراب نوشی شروع کر دی تھی اور وہ ذہنی دباؤ کا شکار تھے۔

میلیان کی دوست اور سنگر ایوانا سٹانک کا کہنا تھا کہ وہ ڈپریشن میں مبتلا ہو گیا تھا، جس کی وجہ سے اس نے خود کشی کر لی۔ انھوں نے میڈیا کو بتایا کہ کیریئر کے خاتمے پر وہ پیدا ہونیوالے مسائل سے نبرد آزما تھا، کیوں کہ فٹبال ہی اس کے لیے سب کچھ تھا، اس نے ایجنٹ کے طور پر کام شروع کیا لیکن یہ ایسا کام ہے جس میں کبھی آمدن ہوتی ہے اور کبھی نہیں، جسکی وجہ سے وہ ذہنی پریشانی کا شکار ہو گیا تھا۔

(جاری ہے)

ایوانا کا کہنا تھا کہ خودکشی سے ایک دن قبل میلیان نے کچھ زیادہ ہی شراب پی لی تھی، مجھے لگا کہ کچھ غلط ہونے کو ہے، اگلی صبح اس نے پھر شراب پی، ایسے میں جب میں نے ایک پستول اس کے سرہانے دیکھی تو میں سناٹے میں آ گئی۔ میں نے روتے ہوئے اس سے کہا کہ پستول یہاں سے ہٹا دے، اور پھر اس کی ماں کو بھی فون کر کے بیٹے سے بات کرنے کو کہا۔ ایوانا کے مطابق انھیں اس بات کا دھڑکا لگا ہوا تھا کہ میلیان کہیں کچھ کر نہ بیٹھے، میں اپارٹمنٹ ہی میں تھی اور بار بار اس پر نگاہ دوڑا رہی تھی کہ وہ کیا کر رہا ہے، پھر اچانک گولی چلنے کی آواز آئی، میں دوڑ کر باہر گئی اور طبی امداد طلب کی، لیکن وہ مرچکا تھا۔

متعلقہ عنوان :