شریف خاندان کی جانب سے اٹھائیس مئی 1998 کے ایٹمی دھماکوں کا کریڈٹ لینے کو ''بیگانی شادی میں عبداللہ دیوانہ'' کے مترادف ہے ، فیاض الحسن چوہان

جمعرات 28 مئی 2020 23:29

لاہور (اُردو پوائنٹ اخبارتازہ ترین - آن لائن۔ 28 مئی2020ء) وزیر اطلاعات پنجاب فیاض الحسن چوہان نے شریف خاندان کی جانب سے اٹھائیس مئی 1998 کے ایٹمی دھماکوں کا کریڈٹ لینے کو ''بیگانی شادی میں عبداللہ دیوانہ'' کے مترادف قرار دیتے ہوئے کہا کہ اگر پاکستان کا ایٹم بم اتفاق فاؤنڈری میں تیار ہوا ہوتا تو پھر قوم آلِ شریف کو کریڈٹ دینے کو تیار ہے۔ فیاض الحسن چوہان نے کہا کہ اسّی کی دہائی میں جب ساری قوم پیٹ پر پتھر باندھ کر ایٹمی پروگرام کی آبیاری کر رہی تھی تب آلِ شریف دو سو سے پانچ سو روپے ٹیکس دیا کرتی تھی۔

(جاری ہے)

فیاض الحسن چوہان نے مزید کہا کہ نواز شریف ایٹمی دھماکے کرنے کے خلاف اور عالمی قوتوں کے ساتھ مالی لین دین کے لئے سول اور ملٹری اسٹیبلشمنٹ کو قائل کرنے میں مصروف تھے۔ اس بات کا اعتراف نواز شریف کے دور کے وزیر خارجہ گوہر ایوب اور ڈاکٹر عبد القدیر خان نے اپنی تحریروں اور انٹرویوز میں بھی کیا ہے۔ وزیرِ اطلاعات نے کہا کہ ایٹمی دھماکوں کا کریڈٹ لینے پر مسلم لیگ ن کی قیادت کو شرم آنی چاہیے۔ پاکستان کے ایٹمی قوت بننے کا کریڈٹ ذوالفقار علی بھٹو، جنرل ضیا الحق، اسحاق خان اور ڈاکٹر عبدالقدیر کو جاتا ہے اور پوری پاکستانی قوم ان شخصیات کو ملک کو ایٹمی قوت بنانے کی کوششوں پر سلامِ محبت پیش کرتی ہے۔ ۔