کورونا ایس او پیز آگہی مہم تیز کی جائے ،راولپنڈی چیمبر آف کامرس

ہفتہ 30 مئی 2020 15:12

راولپنڈی (اُردو پوائنٹ اخبارتازہ ترین - اے پی پی۔ 30 مئی2020ء) راولپنڈی چیمبر آف کامرس نے کورونا ایس او پیز آگہی مہم کو تیز کرنے کی ضرورت پر زور دیتے ہوئے تاجروں اور ملازمین کا ایس او پیز پر عملدر آمد لازم قرار دیا ۔راولپنڈی چیمبر آف کامرس کے صدر صبور ملک نے اے پی پی سے بات چیت کرتے ہوئے کہا کہ ایس او پیز پر سختی سے کار بند ہو کر ہی کورونا سے بچا جا سکتا ہے، ہمیں ایک ذمہ دار شہری کا ثبوت دینا ہو گا۔

انہوں نے کہا کہ جزوی لاک ڈاون میں نرمی سے عام آدمی نے احتیاطی تدابیر کو نظر انداز کیا جو کہ تشویشناک ہے۔

(جاری ہے)

انہوں نے ذرائع ابلاغ پر زور دیا کہ وہ کورونا بچاو آگاہی مہم میں بڑھ چڑھ کر حصہ لیں۔بطور موثر آواز میڈیانوجوان، بچے اور بزرگ تک آگاہی پیغام عام کرنے میں بہترین کردار ادا کرسکتا ہے۔سماجی دوری، ماسک اور دوسری احتیاطی تدابیر کے حوالے سے میڈیا آگاہی مہم تیز کرے۔

انہوں نے ضلعی انتظامیہ سے اپیل کی کہ آگاہی مہم کو تیز کیا جائے۔ انہوں نے کہا کہ ہمارا صحت کا نظام کرونا وائرس کے بڑھتے ہوئے کیسسز سے نمٹنے کی صلاحیت نہیں رکھتا ہے۔۔ انہوں نے کہا موجودہ حالات غیر معمولی ہیں۔ محدود اور محفوظ کاروبار چلانے کے لیے ایس او پیز پر عمل آجر اور صارف دونوں پر لازم ہے۔