طالبان کے ساتھ مذاکرات کے لیے تیار ہیں، عبداللہ عبداللہ

اتوار 31 مئی 2020 10:35

کابل۔ (اُردو پوائنٹ اخبارتازہ ترین - اے پی پی۔ 31 مئی2020ء) افغانستان کی اعلی مصالحتی کونسل کے سربراہ نے طالبان کے ساتھ مذاکرات کے لیے آمادگی ظاہر کی ہے۔کابل میں ایک پریس کانفرنس کو خطاب کرتے ہوئے اعلی مصالحتی کونسل کے سربراہ عبداللہ عبداللہ کا کہنا تھا افغانستان کی حکومت طالبان کے ساتھ مذاکرات کے لیے تیار ہے۔ انہوں نے کہا کہ عید الفطر کے موقع پر تین روزہ جنگ بندی نے امن مذاکرات کے آغاز کے لیے مناسب ماحول فراہم کر دیا ہے۔

(جاری ہے)

اعلی مصالحتی کونسل کے سربراہ نے کہا کہ انہیں توقع ہے خطے کے ممالک بھی امن کے عمل میں تعاون کریں گے کیونکہ افغانستان کا امن خطے کے تمام ملکوں کے مفاد میں ہے۔ عبداللہ عبداللہ نے کہا کہ افغانستان کی اعلی مصالحتی کونسل کی رہبر کمیٹی اور جنرل باڈی کے ارکان کا اعلان آئندہ ہفتے کر دیا جائے گا۔انہوں نے کہا کہ اعلی مصالحتی کونسل نے افغانستان میں پائیدار امن کے قیام کا پختہ عزم کر رکھا ہے اور اس سلسلے میں کسی بھی کوشش سے دریغ نہیں کرے گی۔