وزیر اعظم آزادکشمیر راجہ محمد فاروق حیدرخان اور وفاقی وزیر اسد عمر کی ملاقات

پیر 1 جون 2020 21:57

مظفرآباد۔اسلام آباد یکم جون (اُردو پوائنٹ اخبارتازہ ترین - اے پی پی۔ 01 جون2020ء) وزیر اعظم آزادحکومت ریاست جموں وکشمیر راجہ محمد فاروق حیدرخان اور وفاقی وزیر منصوبہ بندی وترقیات اسد عمر کی ملاقات میں مختلف امور پر تبادلہ خیال کیا گیا ۔ دونوں رہنمائوں نے مقبوضہ کشمیر کی موجودہ صورتحال پر شدید تشویش کا اظہار کیا۔ اس موقع پر گفتگو کرتے ہوئے وزیر اعظم آزادکشمیر نے کہاکہ کورونا کی وباء کے پیش نظر آئندہ مالی سال کے بجٹ میں عوام کو زیادہ سہولیات دینے کی کوشش کرینگے۔

آزادکشمیر کے انفراسٹرکچر کو مزید بہتر بنایا جائے گا ۔ انہوں نے کہاکہ حکومت آزادکشمیر نے کورونا کے پھیلائو کو روکنے کیلئے بروقت اقدامات اٹھائے جس کی وجہ سے اس کا پھیلائو کافی حد تک کنٹرول رہا ۔

(جاری ہے)

مقبوضہ کشمیر کی صورتحال کے حوالے سے ذکر کرتے ہوئے وزیر اعظم آزادکشمیر نے کہاکہ بھارت کورونا کی وباء کی آڑ میں کشمیریوں پر ظلم و ستم ڈھا رہاہے اور ڈومیسائل کے قوانین میں تبدیلی کرکے ہندوئو ں کوباہر سے مقبوضہ کشمیر لاکر بسایا جارہاہے تا کہ وہاں مسلم اکثریت کو اقلیت میں تبدیل کر سکے ۔

انہوں نے کہاکہ حکومت پاکستان سے مطالبہ کرتے ہیں کہ بھارت کے ناپاک عزائم کا نوٹس لے اور عالمی دنیا کو خبردار کرے کہ بھارت کی جانب سے اٹھائے جانے والے اقدامات خطے کوتباہی کی طرف دھکیل رہے ہیں ۔ انہوںنے کہاکہ کورونا کی وباء سے نمٹنے کیلئے ملکر حکمت عملی اپنانا ہو گی ۔