کمرشل امپورٹرز نے سنگین معاشی بحران میں حکومت سے ریلیف کی اپیل کردی

فکسڈ ٹیکس ریجم،ایس آر او 1125بحال کیا جائے، شناختی کارڈ کی شرط ختم کی جائے،امین یوسف بالاگام والا صنعتوں کو خام مال کی بلاتاخیر ترسیل کے لیے 24گھنٹے پیٹرول پمپس کھولے جائیں ،چیئرمین پی سی ڈی ایم اے

جمعہ 5 جون 2020 20:00

کراچی(اُردو پوائنٹ اخبارتازہ ترین - این این آئی۔ 05 جون2020ء) پاکستان کیمیکلز اینڈ ڈائز مرچنٹس ایسوسی ایشن (پی سی ڈی ایم ای) کے چیئرمین و سابق ڈائریکٹر کراچی اسٹاک ایکسچینج امین یوسف بالاگام والانے کرونا کی مہلک وبا سے ہونے والی معاشی تباہ کاریوں اور سنگین کاروباری نقصانات کے پیش نظر وزیراعظم عمران خان سے اپیل کی ہے کہ صنعتی خام مال کے کمرشل امپورٹرز کوفکسڈ ٹیکس ریجم میں بحال کیا جائے اور ملک کے بہتر ترین معاشی مفاد میں ایس آر او1125کو بھی دوبارہ بحال کیا جائے تاکہ تجارت وصنعت کو مکمل تباہی سے بچایا جاسکے۔

امین یوسف بالا گام والا نے وزیراعظم سے اپیل میں کہاکہ کرونالاک ڈاؤن اور سنگین معاشی بحران کے نتیجے میں کمرشل امپورٹرز کا کاروبار تباہ ہو گیاہے اور انہیں سرمائے کی شدید کمی کا سامنا ہے ۔

(جاری ہے)

کرونا کے باعث پاکستان سمیت دنیا بھر میں لاک ڈاؤن اور ملکی صنعتوںو مارکیٹوں کی بندش کے باعث کمرشل امپورٹرز کا سرمایہ پھنس کر رہ گیا ہے اوراب صورتحال اس نہج پر پہنچ گئی ہے کہ کمرشل امپورٹرز کے پاس خام مال کی درآمد بحال کرنے کے لیے سرمایہ بھی نہیں جس سے ملکی صنعتوں باالخصوص معیشت میںریڑھ کی ہڈی کی حیثیت کی حامل ٹیکسٹائل انڈسٹری اور برآمدی صنعتوں کو طلب کے مطابق خام مال کی فراہمی ممکن نہیں ہوسکے گی اور اگر خام مال کی قلت پیدا ہوئی تو برآمدی صنعتوں کی پیدواری سرگرمیاں بھی رکاوٹ کا شکار ہوں گی جس کے ملک کی برآمدات پر انتہائی منفی اثرات مرتب ہوں گے جو کہ پہلے ہی سنگین بحرانوں کا شکار ہے۔

انہوںنے سوال اٹھایا کہ حکومت کا صرف گنے چنے شعبوں کو ریلیف دینا تاجربرادری کے لیے تشویش کا باعث ہے بلکہ حکومت کو چاہیے کہ وہ موجودہ غیرمعمولی حالات کی نزاکت کو سمجھتے ہوئے تمام شعبوں کو یکساں بنیاد پر ریلیف دے کیونکہ معاشی استحکام اور ملک کو ترقی کی شاہراہ پر گامزن کرنے میں فرد واحد نہیں بلکہ سب کا کردار ہوتا ہے لہٰذا برآمدی شعبہ ہو یا درآمدی ، حکومت بلاتفریق ریلیف دے تاکہ کرونا سے متاثرہ کاروبار و صنعتیں دوبارہ اپنے پاؤں پر کھڑی ہوسکیں۔

امین یوسف بالاگام والانے وزیراعظم سے غیر رجسٹرڈ افراد کو مال کی فروخت پر شناختی کارڈ کی شرط کو ختم کرنے کا مطالبہ کرتے ہوئے کہاکہ اگرکمرشل امپورٹرز کو فوری طور پر ریلیف نہ دیا گیا تو وہ اپنا کاروبار بند کرنے پر مجبور جائیں گے لہٰذا شناختی کارڈ کی شرط ختم کرنے اور ایس آر او 1125بحال کرنے کے علاوہ کمرشل امپورٹرز کو فکسڈ ٹیکس ریجم میں بحال کیا جائے جوکہ تجارت و صنعت کو تباہ ہونے سے بچانے کا واحد راستہ ہے۔انہوںنے صنعتوں کو بلاتعطل خام مال کی سپلائی کے لیے پیٹرول پمپس24گھنٹے کھلے رکھنے کی بھی درخواست کی اور وزیراعظم سے یہ اپیل بھی کی کہ ہفتہ میں 6روز کاروبار کرنے کی اجازت دی جائے تاکہ کرونا لاک ڈاؤن سے ہونے والے نقصانات کا ازالہ ہوسکے۔