خیبرپختونخوا کے وزیر ٹرانسپورٹ کی ہدایت پر صوبے بھر میں ایس او پیز اور نئے کرایہ نامہ کی خلاف ورزی پر کریک ڈاؤن

صوبے بھر میں گزشتہ روز پانچ بڑے اڈووں سمیت کئی چھوٹے سٹینڈ سیل اور لاکھوں کے جرمانے عائد, سیکریٹری ٹرانسپورٹ ریجنل ٹرانسپورٹ اتھارٹیز پشاور مردان، بنوں، سوات، مالاکنڈ نے کئی اڈے سیل کئے اور زائد کرایے وصول کرنے سینکڑوں گاڑیوں کو جرمانے کئے، ذاکر حسین آفریدی

جمعہ 5 جون 2020 20:31

پشاور(اُردو پوائنٹ اخبارتازہ ترین - این این آئی۔ 05 جون2020ء) خیبرپختونخوا کے صوبائی وزیر ٹرانسپورٹ ملک شاہ محمد وزیر کی ہدایت پر محکمہ ٹرانسپورٹ کا صوبہ بھر میں کرونا ایس او پیز اور نئے کرایہ نامہ کی خلاف ورزی پر کریک ڈاؤن کا آغاز کر لیا ہے اور اس طرح صوبہ بھر میں گزشتہ روز پانچ بڑے اڈووں سمیت کئی چھوٹے سٹینڈ سیل اور لاکھوں کے جرمانے عائد کئے گئے ہیں سیکریٹری ٹرانسپورٹ ذاکر حسین آفریدی نے ریجنل ٹرانسپورٹ اتھارٹیز اور ضلعی انتظامیہ کو ایس او پیز اور نئے کرایہ نامہ پر عملدرآمد تیز کرنے کی ہدایت کرتے ہوئے کہا ہے کہ ریجنل ٹرانسپورٹ اتھارٹیز پشاور مردان، بنوں، سوات، مالاکنڈ نے کئی اڈے سیل کئے ہیں اور زائد کرائے وصول کرنے سینکڑوں گاڑیوں کو پکڑنے کے بعد ان پر جرمانے بھی عائد کئے ہیں ذاکر حسین آفریدی نے کہا ہے کہ اتھارٹیز نے مسافروں کو فیس ماسک لازمی لگانے اور سماجی فاصلہ برقرار رکھنے کی ہدایت بھی کی ہے سیکریٹری ٹرانسپورٹ کا کہنا تھا کہ ایس او پیز اور نئے کرایہ نامہ پر عملدرآمد یقینی بنانے کے لئے کریک ڈاؤن جاری رہیگا سیکریٹری ٹرانسپورٹ نے ریجنل ٹرانسپورٹ اتھارٹیز کو ہدایات جاری کرتے ہوئے کہا ہے کہ روزانہ کی بنیاد پر آپریشن اور کارکردگی رپورٹ پیش کی جائے اور اس میں کسی قسم کی کوتاہی برداشت نہیں کی جائے گی۔