رواں مالی سال کے دوران سبزیوں کی مصنوعات کی برآمدات میں 0.63فیصد اضافہ

ہفتہ 6 جون 2020 11:11

اسلام آباد (اُردو پوائنٹ اخبارتازہ ترین - اے پی پی۔ 06 جون2020ء) رواں مالی سال کے دوران سبزیوں کی مصنوعات کی برآمدات میں 0.63فیصد اضافہ ہوا ہے ۔ سٹیٹ بینک آف پاکستان( ایس بی پی) کے اعدادوشمار کے مطابق جاری مالی سال کے پہلے دس ماہ میں جولائی تا اپریل2019-20ء کے دوران برآمدات کا حجم 2779.148 ملین ڈالر تک بڑھ گیا جبکہ گذشتہ مالی سال کے اسی عرصہ کے دوران برآمدات سے 2761.596 ملین ڈالرز زرمبادلہ کمایا گیا تھا۔

اس طرح برآمدات میں0.63فیصداضافہ ریکارڈ کیا گیا ہے۔ رپورٹ کے مطابق جاری مالی سال کے دوران سبزیوں کی برآمدات میں38.43فیصد اضافہ ہوا جس سے برآمدات190.059 ملین ڈالرکے مقابلہ میں 263.100 ملین ڈالر تک بڑھ گئیں۔اسی طرح سیریلز کی برآمدات بھی 3.39 فیصد کے اضافے سے 1842.623 ملین ڈالر کے مقابلے میں 1905.160 ملین ڈالر تک پہنچ گئیں۔

(جاری ہے)

مزید برآں سبزیاں اگانے کے سامان کی برآمدات میں بھی 19.96فیصد اضافہ ہوا اور برآمدات کی مالیت6.996ملین ڈالر تک بڑھ گئیں جبکہ گذشتہ مالی سال کے اسی عرصہ کے دوران5.845 ملین ڈالر برآمدات کی گئی تھیں۔

ایس بی پی کے مطابق گذشتہ مالی سال کے مقابلے میں رواں مالی سال کے دوران سبزیوں کی مصنوعات کی مجموعی برآمدات میں 0.63 فیصد اضافہ ریکارڈ کیا گیا ہے جبکہ تیل دار اجناس اور پھلوں سمیت مختلف مصنوعات کی برآمدات میں بھی معمولی کمی ریکارڈ کی گئی ہے۔