رانا ثناء اللہ کے خلاف منشیات برآمدگی کیس کی سماعت11 جولائی تک ملتوی

ہفتہ 6 جون 2020 12:27

لاہور (اُردو پوائنٹ اخبارتازہ ترین - اے پی پی۔ 06 جون2020ء) انسداد منشیات عدالت لاہور نے مسلم لیگ( ن) کے رہنما و رکن قومی اسمبلی رانا ثناء اللہ کے خلاف منشیات برآمدگی کیس میں رانا ثناء اللہ کی حاضری معافی کی درخواست منظور کرتے ہوئے کیس کی سماعت11 جولائی تک ملتوی کردی ہے۔ انسداد منشیات کی خصوصی عدالت کے جج شاکر حسن نے کیس کی سماعت کی۔

(جاری ہے)

ہفتہ کے روز عدالتی سماعت پر رانا ثناء اللہ کے وکیل نے عدالت کو آگاہ کیا کہ قومی اسمبلی کے اجلاس میں شرکت کے باعث رانا ثناء اللہ عدالت پیش نہیں ہوسکتے۔

لہذا اسمبلی سیشن میں شرکت کے باعث عدالت سے حاضری کی معافی کی درخواست منظور کی جائے، جس پر عدالت نے گزشتہ روز کی حاضری سے استثنیٰ کی درخواست منظور کرتے ہوئے کیس کی سماعت ملتوی کردی اور آئندہ سماعت پر فریقین کو بحث کے لئے طلب کر لیا۔ پنجاب کے سابق صوبائی وزیر قانون رانا ثناء اللہ پر 15 کلو منشیات برآمد ہونے کا الزام ہے۔ اے این ایف نے ان کے خلاف 15 کلو ہیروئن برآمدگی کا مقدمہ درج کر رکھا ہے۔