لائن آف کنٹرول پر بھارتی فوج کی جانب سے بدترین فائرنگ

آزاد کشمیر کے کریلہ سیکٹر پر شہری آبادی کو نشانہ بنایا گیا، 1 خاتون شدید زخمی ہوگئی، پاک فوج کا بھی منہ توڑ جواب

محمد علی جمعرات 25 جون 2020 22:00

راولپنڈی (اُردو پوائنٹ اخبارتازہ ترین۔ 25 جون2020ء) لائن آف کنٹرول پر بھارتی فوج کی جانب سے بدترین فائرنگ، آزاد کشمیر کے کریلہ سیکٹر پر شہری آبادی کو نشانہ بنایا گیا، 1 خاتون شدید زخمی ہوگئی، پاک فوج کا بھی منہ توڑ جواب۔ تفصیلات کے مطابق بھارت نے چین کے بعد پاکستان کی سرحد پر بھی اشتعال انگیز کاروائیاں تیز کر دی ہیں ۔

(جاری ہے)

پاک فوج کے شعبہ تعلقات عامہ (آئی ایس پی آر) کے مطابق جمعرات کی شب کو بھارتی فوج نے ایک مرتبہ پھر لائن آف کنٹرول کے کریلہ سیکٹر پر بلااشتعال فائرنگ کرتے ہوئے شہری آبادی کو نشانہ بنایا۔

بھارتی فوج کی فائرنگ سے باٹلہ متھرانی گاوں سے تعلق رکھنے والی خاتون شدید زخمی ہوگئی۔ بھارتی فوج کی بلا اشتعال فائرنگ پر پاک فوج نے بھی بھر پور جواب دیا۔ پاک فوج کے منہ توڑ جواب کے بعد بھارتی فوج کی بندوقیں خاموش ہوگئیں۔ واضح رہے کہ بھارتی فوج نے ایک جانب چین کیساتھ محاذ آرائی شروع کر رکھی ہے، تو دوسری جانب لائن آف کنٹرول پر بھی اشتعال انگیز کاروائیوں میں اضافہ کر دیا ہے۔