آسٹریلیا لوٹنے والے افراد کی تعداد پر پابندی عائد کرنے کا اعلان

آئندہ پیر سے ملک میں صرف 4000 افراد کی ہر ہفتے آمد کی اجازت ہوگی،وزیراعظم سکاٹ مورسن

جمعہ 10 جولائی 2020 12:48

آسٹریلیا لوٹنے والے افراد کی تعداد پر پابندی عائد کرنے کا اعلان

کینبرا(اُردو پوائنٹ اخبارتازہ ترین - این این آئی۔ 10 جولائی2020ء) آسٹریلوی وزیراعظم سکاٹ مورسن نے کہاہے کہ آئندہ پیر سے ملک میں صرف 4000 افراد کی ہر ہفتے آمد کی اجازت ہوگی تاہم ابھی یہ واضح نہیں ہے کہ اس کا یہ مطلب ہے کہ ہم صرف 4000 آسٹریلوی شہریوں کو ملک لوٹنے دیں گے۔

(جاری ہے)

میڈیارپورٹس کے مطابق ملک کے دوسرے برے شہر میلبورن میں کورونا وائرس کے کیسز میں تیزی سے اضافے کے بعد آسٹریلیا ملک میں آنے والے لوگوں کی تعداد پر حد مقرر کرنے کی کوشش کر رہا ہے۔

وزیراعظم مورسٹ کا کہنا تھا کہ آسٹریلیا تک رسائی برقرار رکھی جائے گی تاہم آنے والی پروازوں پر جگہ کم ہوگی۔ان کا کہنا تھا کہ موجودہ حالات کو دیکھتے ہوئے میرا نہیں خیال کہ یہ غیر مناسب اقدام ہے۔میلبورن جانے والی تمام بین الاقوامی پروازوں کو پہلے ہی منسوخ کیا جا چکا ہے اور ملک پہنچنے والی زیادہ تر پروازیں سڈنی اور پرتھ جا رہی ہیں۔اس وبا کے آغاز سے اب تک تقریباً تین لاکھ آسٹریلوی شہری وطن واپس لوٹ چکے ہیں۔