یورپی یونین کے ممالک اور امریکہ میں کپڑے اورملبوسات کی طلب میں کمی سے پاکستانی ٹیکسٹائل کی صنعت متاثر ہوئی ہے، کنزولا ویریلا

ہفتہ 11 جولائی 2020 10:50

اسلام آباد ۔ (اُردو پوائنٹ اخبارتازہ ترین - اے پی پی۔ 11 جولائی2020ء) یورپی یونین کے ممالک اور امریکہ میں کپڑے اورملبوسات کی طلب میں کمی سے پاکستانی ٹیکسٹائل کی صنعت متاثر ہوئی ہے۔ پاکستان ٹیکسٹائل کی صنعت کی پروڈکٹیویٹی بنگلہ دیش کے مقابلہ میں کم ہے۔ برآمدات کے فروغ کی جدید سہولیات سے استفادہ کے تحت نئی منڈیوں تک رسائل حاصل کی جاسکتی ہے۔

عالمی بینک کے سینئر اکانومسٹ کنزولا ویریلا نے کہا ہے کہ برآمدات کے فروغ کے حوالے سے دستیاب جدید ذرائع سے استفادہ اور آگاہی پاکستان کے چھوٹے اور درمیانے درجے کے کاروباری اداروں کے شعبہ( ایس ایم ایز) کیلئے عالمی منڈی تک نئی راہیں ہموار کرسکتے ہیں۔ عالمی منڈی کی ضروریات اورمعیارات سے آگاہی انتہائی ضروری ہے۔ آن لائن مباحثہ میں گفتگوکرتے ہوئے انہوں نے کہا کہ پاکستانی صنعتوں کی پروڈکٹیویٹی بنگلہ دیش کے مقابلہ میں کم ہے۔

(جاری ہے)

انہوں نے کہا کہ اس کی بڑی وجہ سرمایہ کاری کی شرح کم ہونا ہے۔ انہوں نے مزید کہا کہ پاکستان میں نجی شعبہ کی استعداد کار میںا ضافہ کیلئے زیادہ سے زیادہ سرمایہ کاری کی ضرورت ہے۔ انہوں نے صنعتی شعبہ کو عالمی معیارات کے مطابق جدید تقاضوں سے ہم آہنگ کرنے کیلئے زیادہ سے زیادہ براہ راست غیرملکی سرمایہ کاری(ا یف ڈی آئی) کو متوجہ کرنے کی ضرورت پر بھی زوردیا تاکہا یس ایم ایز کے شعبہ کے مالی مسائل کو ختم کیا جاسکے۔

انہوں نے کہا کہ ایف ڈی آئی کے فروغ سے پاکستان کی صنعتوں کے بین الاقوامی ویلیو چین سے رابطوں میں اضافہ کی مدد سے برآمدات کی بڑھوتری میں مدد حاصل ہوگی۔ انہوں نے مزید کہا کہ پاکستان کو چاہئے کہ برآمدات میں اضافہ کیلئے درآمدی ٹیرف میں کمی، لاجسٹک کی سہولیات میں اضافہ اور سمارٹ برانڈنگ کے وژن کو فروغ دے تاکہ عالمی مارکیٹ میں بہتر مقام حاصل کرکے برآمدات میں اضافہ کے مطلوبہ ہدف کو حاصل کرسکے۔