کورونا مریضوں کیلئے بنایا گیا ایکسپو سنٹر لاہور کا فیلڈ ہسپتال سفید ہاتھی بن گیا

ہسپتال میں ڈاکٹر نرسیں اور پیرا میڈیکل سمیت کرونا کے علاج میں استعمال ہونے والے آلات تو موجود ہیں لیکن ایکسپو فیلڈ ہسپتال میں کوئی مریض زیرعلاج نہیں رہا

ہفتہ 11 جولائی 2020 20:51

کورونا مریضوں کیلئے بنایا گیا ایکسپو سنٹر لاہور کا فیلڈ ہسپتال سفید ..

لاہور (اُردو پوائنٹ اخبارتازہ ترین - آن لائن۔ 11 جولائی2020ء) صوبائی دارلحکومت لاہور میں کرونا وائرس کے تصدیق شدہ مریضوں کے علاج معالجہ کے لئے ایکسپو سنٹر لاہور میں بنایا گیا فیلڈ ہسپتال حکومت کے لئے سفید ہاتھی کی شکل اختیار کر گیا ہے مذکورہ فیلڈ ہسپتال میں ڈاکٹر نرسیں اور پیرا میڈیکل سمیت کروناکے علاج میں استعمال ہونے والے آلات تو موجود ہیں لیکن ایکسپو فیلڈ ہسپتال میں کوئی مریض زیر علاج نہیں رہا۔

جس کے باعث ایکسپو سنٹر کا کرایہ جو اس وقت 55 کروڑ ہے بغیر مریضوں کے اگر ہسپتال کو جوں کا توں رکھا گیا تو کرائے میں مزید اضافہ ہو سکتا ہے۔

(جاری ہے)

یہ بھی بتایا گیا ہے کہ ایکسپو سنٹر فیلڈ ہسپتال میں آخری چار مریض زیر علاج تھے جنہیں بھی ڈسچارج کردیا گیا ہے۔ 90کروڑ کے اس منصوبے کی مد میں لاہور کی ضلعی انتظامیہ یا محکمہ صحت پنجاب ایکسپو سنٹر انتظامیہ کے 55 کروڑ روپے کے نادہندہ ہیں۔

1 ہزار بستروں پر مشتمل اس فیلڈ ہسپتال کی مد میں ایکسپو سنٹر میں پنجاب حکومت سے جو کروڑوں روپے موصول کرنے ہیں وہ تاحال ادا نہیں کئے گئے جبکہ ایکسپو سنٹر انتظامیہ کا مرکزی ذرائع آمدن ہی کرایہ ہے جو انتظامیہ ایکسپو سنٹر میں مختلف سیمینار نمائشیں اور دیگر تقریبات منعقد کر کے کرائے کی مد میں وصول کرتی ہے۔