دنیا بھر میں اسلحے کے کارخانوں کو بند کر دنیا چاہیے ، احمدی نژاد

ایران کی تاریخ میں سب سے زیادہ دبا ئوکا نشانہ بنائے جانے والے سربراہ رہا ہوں،سابق صدر انٹرویو

پیر 13 جولائی 2020 22:37

تہران (اُردو پوائنٹ اخبارتازہ ترین - آن لائن۔ 13 جولائی2020ء) ایران کے سابق صدر محمود احمدی نڑادنے کہاہے کہ میں سمجھتا ہوں کہ دنیا میں اسلحے کی تمام فیکٹریوں کو بند کر دینا چاہیے ،اسلحے اور ہتھیاروں کا فائدہ کیا ہے یہ محض انسانوں کے قتل اور ان کی گرفت کے لیے استعمال ہوتا ہے،ہتھیاروں کا مطلب کیا ہے میڈیارپورٹس کے مطابق سابق صدر نے یہ بات ایرانیوں اور امریکیوں کے ایک چینل کے لیے اسکائپ کے ذریعے دیے گئے انٹرویو میں کہی۔

سابق صدر کا کہنا تھا کہ وہ ایران کی تاریخ میں سب سے زیادہ دبا ئوکا نشانہ بنائے جانے والے سربراہ ہیں۔ انہوں نے مزید کہا کہ میرے حکمراں رہتے ہوئے میرا بائیکاٹ کر دیا گیا تھا۔احمدی نڑاد کے مطابق اقتدار کے حصول کے لیے دوسروں پر الزامات عائد کرنے کی ضرورت نہیں ہوتی۔

(جاری ہے)

انہوں نے کہا کہ ہم پر سماج کی بیماریوں کا علاج کرنا لازم ہے،اگر آپ سیاسی اختیارات کی تلاش میں ہیں تو پھر دوسروں پر الزام کیوں عائد کرتے ہیں احمد نڑاد نے کہا کہ جب آپ ایرانی ٹیلی وڑن دیکھتے ہیں تو اس پر کہا جا رہا ہوتا ہے کہ پوری دنیا خراب ہے ، ہم سے زیادہ بری ہے ،یہ رجحان درست نہیں ہے،اگر دوسرے لوگ خراب ہیں تو کیا اس کا مطلب یہ ہوا کہ ہم اچھے ہیں یہ ممکن ہے کہ دوسرے تمام برے ہوں اور ہم بد ترین یا پھر دوسرے تمام برے ہوں اور ہم بھی خراب ہوں۔