دہری شہرت معاملہ ،الیکشن کمیشن کاوفاقی وزیر فیصل ووڈا کو نوٹس، درخواست گزاروں سے بھی جواب طلب کرلیا

اگر فیصل واڈا کی جانب سے آئندہ سماعت پر کوئی پیش نہ ہوا تو یکطرفہ کارروائی کریں گے،الیکشن کمیشن کا عندیہ

پیر 20 جولائی 2020 21:15

اسلام آباد (اُردو پوائنٹ اخبارتازہ ترین - این این آئی۔ 20 جولائی2020ء) الیکشن کمیشن نے وفاقی وزیر آبی وسائل فیصل واڈا کے خلاف مبینہ دہری شہریت چھپانے کے معاملے پر وفاقی وزیر کو نوٹس جاری کرتے ہوئے درخواست گزاروں سے بھی جواب طلب کرلیا ۔وفاقی وزیر آبی وسائل فیصل واڈا کے خلاف مبینہ دہری شہریت چھپانے کے معاملے پر الیکشن کمیشن میں نااہلی کی درخواستوں پر سماعت چیف الیکشن کمیشنر کی سربراہی میں 5 رکنی کمیشن نے کی ۔

فیصل واڈا کی جانب سے کوئی بھی الیکشن کمیشن میں پیش نہ ہوا۔

(جاری ہے)

الیکشن کمیشن نے درخواستگزاروں سے درخواست قابل سماعت ہونے سے متعلق جواب طلب کر لیا،الیکشن کمیشن نے فیصل واڈا کو بھی نوٹس جاری کر دیا۔ چیف الیکشن کمشنر نے درخواست گزاروں کو حکم دیاکہ آئندہ سماعت پر آپ جواب جمع کرا کے دلائل دیں۔ الیکشن کمیشن نے کہاکہ اگر فیصل واڈا کی جانب سے آئندہ سماعت پر کوئی پیش نہ ہوا تو یکطرفہ کارروائی کریں گے۔الیکشن کمیشن نے درخواستگزاروں کو جواب جمع کرانے کے لیے 15 دنوں کی مہلت دے دی،فیصل واڈا کے وکیل نے گزشتہ سماعت پر درخواستوں کے قابل سماعت ہونے پر اعتراض عائد کیا تھا۔