ْترک صدر رجب طیب اردوان کا صدر مملکت ڈاکٹر عارف علوی کو ٹیلیفون، عیدالاضحی کی مبارکباد دی

اس سال عیدالاضحی مشکل حالات میں منائی جا رہی ہے، دنیا کو کئی چیلنجز درپیش ہیں، بھارتی مسلمان خوف اور امتیازی سلوک کے ماحول میں زندگی گزار رہے ہیں، امید ہے ترکی کشمیر میں بھارتی غیر قانونی اور یک طرفہ اقدامات کے ایک سال مکمل ہونے پر اپنی اصولی آواز اٹھائے گا، مشکل حالات میں بھی قابض حکومتیں فلسطین اور کشمیر میں اپنا ظلم و جبر جاری رکھے ہوئے ہیں، پاکستان ترکی کے ملکی مفادات پر مستقل حمایت اور ہر ممکن مدد فراہم کرنے کی پالیسی جاری رکھے گا، صدر مملکت ڈاکٹر عارف علوی کی گفتگو

ہفتہ 1 اگست 2020 23:35

اسلام آباد ۔ یکم اگست (اُردو پوائنٹ اخبارتازہ ترین - اے پی پی۔ 01 اگست2020ء) ترکی کے صدر رجب طیب اردوان نے ہفتہ کو صدر مملکت ڈاکٹر عارف علوی سے ٹیلی فون پربات چیت کی اور عیدالاضحی کے مبارک موقع پرانہیں مبارکباد پیش کی۔ صدر مملکت ڈاکٹر عارف علوی نے بھی ترک صدر اردوان کو عید کی مبارکباد دی اور ان کیلئے نیک خواہشات کا اظہارکیا۔ ترک صدر سے گفتگو کرتے ہوئے ڈاکٹرعارف علوی نے کہاکہ اس سال عیدالاضحی مشکل حالات میں منائی جا رہی ہے اور دنیا کو کئی چیلنجز درپیش ہیں۔

صدر مملکت ڈاکٹر عارف علوی نے کہاکہ کوویڈ 19 نے عالمی معیشت کو بری طرح سے متاثر کیا ہے۔ انہوں نے پاکستان سمیت متعدد ممالک کو کوویڈ 19 کے خلاف جنگ میں معاونت فراہم کرنے پر ترکی کے رہنما کے کردار کی تعریف کی۔

(جاری ہے)

بات چیت میں دونوں رہنمائوں نے کہاکہ پا کستان اور ترکی میں کورونا کے کیسز کی تعداد میں کمی خوش آئند ہے۔ صدر عارف علوی نے غیرقانونی طورپربھارت کے زیرتسلط جموں و کشمیر میں کشمیریوں کی حالت زار پر روشنی ڈالی اورکہاکہ بھارتی مسلمان خوف اور امتیازی سلوک کے ماحول میں زندگی گزار رہے ہیں،صدر عارف علوی نے اقوام متحدہ کی جنرل اسمبلی میں صدر اردوان کے کشمیر پر پرزور اور واضح موقف پر اٴْن کا شکریہ ادا کیا۔

انہوںنے اس امیدکااظہارکیا کہ ترکی کشمیر میں بھارتی غیر قانونی اور یک طرفہ اقدامات کے ایک سال مکمل ہونے پر اپنی اصولی آواز اٹھائے گا ۔صدرنے کہاکہ مشکل حالات میں بھی قابض حکومتیں فلسطین اور کشمیر میں اپنا ظلم و جبر جاری رکھے ہوئے ہیں۔ ترکی کے صدر نے ڈاکٹر عارف علوی کو کورونا وبا کے خاتمے پر ترکی کا دورہ کرنے کی دعوت بھی دی۔صدرنے کہاکہ پاکستان ترکی کے ملکی مفادات پر مستقل حمایت اور ہر ممکن مدد فراہم کرنے کی پالیسی جاری رکھے گا۔انہوںنے صدر اردوان کو آیا صوفیہ کو نماز کیلئے دوبارہ کھولنے پر مبارکباد بھی دی۔