روس کا سمندر کی گہرائی سے متعدد جوہری اشیاء کو ہٹانے کا عندیہ

جمعہ 7 اگست 2020 16:16

ماسکو (اُردو پوائنٹ اخبارتازہ ترین - اے پی پی۔ 07 اگست2020ء) روس کی سرکاری جوہری ایجنسی روساتوم کا کہنا ہے کہ وہ اگلے آٹھ سالوں میں دو آبدوزیں اور چار ری ایکٹر کمپارمنٹس کو سمندر کے نیچے سے اٹھا لے گا۔

(جاری ہے)

روسی ذرائع ابلاغ کے مطابق 1960 کی دہائی کے آخر سے 1980 کی دہائی کے آخر تک ، تقریبا 18000تابکار اشیاء روس کے دور دراز کے شمالی پانیوں میں پھینک دی گئیںجن میں سے بیشتر بہت کم ماحولیاتی خطرہ پیش کرتی ہیں لیکن کچھ کو آرکٹک ماحولیاتی نظام کے تحت خطرہ کے طور پر دیکھا جا رہا ہے۔

اگلے 8سالوں میں روساتوم کا ارادہ ہے کہ وہ روس کے آرکٹک پانی کے نیچے سے 6 چیزیں اٹھائے جو تابکار آلودگی کے معاملے میں سب سے زیادہ خطرناک ہیں ۔ان اشیاء میں 4ری ایکٹر کے علاوہ 2 پوری آبدوزیں بھی شامل ہیں۔واضح رہے کہ 6 خطرناک جوہری اشیاء کو اٹھانا نہ صرف تکنیکی لحاظ سے مشکل ہوگا بلکہ بہت مہنگا بھی ہوگا۔روساتوم اور یوروپی کمیشن کے لئے بنائی جانے والی ایک حالیہ رپورٹ میں ان چھ اشیاء کو اٹھانے کے اخراجات کا تخمینہ 278 ملین یورو ہے۔