سٹیٹ بینک کی روزگار سکیم کے تحت مختلف بینکوں کی طرف سے 125.9 ارب روپے کے قرضوں کی منظوری

اسلام آباد (اُردو پوائنٹ اخبارتازہ ترین - اے پی پی۔ 13 اگست2020ء) سٹیٹ بینک آف پاکستان کی روزگار سکیم کے تحت مختلف بینکوں نے 125.9 ارب روپے کے قرضوں کی منظوری دی ہے جس سے 12 لاکھ سے زیادہ کارکنوں کو تنخواہیں ادا کی جا سکیں گی۔ سٹیٹ بینک کی رپورٹ کے مطابق روزگار سکیم کا مقصد صنعتی و کاروباری اداروں میں کام کرنے والے کارکنوں کو کووڈ۔19 کے منفی اثرات سے تحفظ کے ساتھ ساتھ ان کے روزگار کو محفوظ بنا کر بے روزگاری سے بچانا ہے۔

ایس بی پی کے مطابق 10 جولائی 2020ء تک مختلف بینکوں کی جانب سے 2068 اداروں کی جانب سے روزگار سکیم کے تحت قرضہ کے حصول کی درخواستوں کی منظوری دی گئی ہے اور منظور کئے گئے قرضہ جات کی کل مالیت 125.9 ارب روپے ہے جس سے ان اداروں کے 12 لاکھ سے زیادہ کارکنوں کو تنخوہیں ادا کی جائیں گی۔

(جاری ہے)

روزگار سکیم کے آغاز کے بعد بڑی تعداد میں کاروباری و صنعتی اداروں نے قرضہ حاصل کرنے کے لئے اپلائی کیا تھا اور سٹیٹ بینک کی کاوشوں سے قرضوں کی فراہمی کے عمل میں تیزی لائی گئی۔

آغاز میں قرض منظوری کا عمل سست تھا اور اپریل 2020ء کے اختتام تک صرف 18 فیصد درخواستوں کی منظوری دی جا سکی تھی تاہم ایس بی پی کے اقدامات سے 10 جولائی 2020ء تک روزگار سکیم کے تحت قرض حاصل کرنے کی کل درخواستوں کے 76 فیصد کے مساوی درخواستوں کی منظوری ہو چکی ہے۔ رپورٹ کے مطابق منظور کئے گئے مجموعی قرضوں میں سے 31 ارب روپے کے قرضہ جات 1449 ایس ایم ایز اور چھوٹے کاروباری اداروں کو فراہم کئے جا رہے ہیں جس سے 2 لاکھ 80 ہزار 437 کارکنوں کے روزگار کو تحفظ حاصل ہو گا۔ رپورٹ کے مطابق جے ایس بینک، حبیب بینک، بینک الحبیب، بینک الفلاح اور عسکری بینک روزگار سکیم کے تحت قرضوں کی فراہمی اور درخواستوں کی منظوری کے حوالہ سے سب سے نمایاں ہیں۔