نیب آفس ہنگامہ آرائی کے مقدمہ میں نامزد ملزمان کی عبوری ضمانت میں 22 ستمبر تک توسیع

جمعہ 18 ستمبر 2020 12:53

لاہور (اُردو پوائنٹ اخبارتازہ ترین - اے پی پی۔ 18 ستمبر2020ء) لاہور کی انسدادِ دہشت گردی کی خصوصی عدالت نے نیب لاہور آفس کے باہر ہنگامہ آرائی اور توڑ پھوڑ کے مقدمہ میں نامزد مسلم لیگ ن کے رہنماؤں سیف الملوک کھوکھر ، فیصل کھوکھر سمیت دیگر ملزمان کی عبوری ضمانت میں 22 ستمبر تک توسیع کر دی۔انسداد دہشت گردی کی خصوصی عدالت کے جج ارشد حسین بھٹہ نے کیس کی سماعت کی۔

(جاری ہے)

جمعہ کو عدالتی سماعت پر سیف الملوک کھوکھر ، فیصل کھوکھر سمیت دیگر ملزمان عبوری ضمانت میں توسیع کے لئے عدالت میں پیش ہوئے۔عدالت نے ملزمان کی حاضری مکمل کی اور عبوری ضمانتوں میں توسیع کرتے ہوئے ملزمان کو شامل تفتیش ہونے کا حکم دے دیا۔پولیس تھانہ چوہنگ نے نیب حکام کی درخواست پر نیب لاہور دفتر میں مسلم لیگ ن کی رہنما مریم نواز کی پیشی کے موقع پر ہنگامہ آرائی اور توڑ پھوڑ کے الزام میں مقدمہ درج کیا تھا۔عدالت نے آئندہ سماعت پر پولیس سے مقدمہ کا ریکارڈ بھی طلب کر لیا۔