کورونا کی وباء دیار غیر میں مطمئن زندگی گزارنے والے پاکستانی بزنس مین کے لیے ڈراؤنا خواب ثابت ہوئی

ابوظہبی (اردو پوائنٹ اخبار تازہ ترین۔ 20 ستمبر 2020ء) کورونا کی وباء دیار غیر میں مطمئن زندگی گزارنے والے پاکستانی بزنس مین کے لیے ڈراؤنا خواب ثابت ہوئی۔ پاکستانی تارک وطن محمد ابوبکر شریف کے والد نے 1989ء میں ابوظہبی میں ایک ریستوران کھولا، کورونا نے سب کچھ اجاڑ کے رکھ دیا، 32 سال کا عرصہ متحدہ عرب امارات میں گزارنے والا محمد ابوبکر ٹوٹے دل سے کنبے سمیت پاکستان لوٹ آیا۔

تفصیلات کے مطابق کورونا وائرس نے دنیا بھر میں اپنے مضر اثرات چھوڑے ہیں۔ تقریباََ ہر انسان کسی نہ کسی حوالے سے اس وباء سے متاثر ہوا ہے۔ کسی نے اپنے پیارے کھو دیے تو کسی سے اپنے پیاروں کے لیے روزی کمانے کا واحد ذریعہ چھن گیا۔ جن کی نوکریاں محفوظ ہیں ان کی تنخواہیں کم کر دی گئیں اور بڑی تعداد میں لوگوں کو نوکریوں سے ہی ہاتھ دھونا پڑا ہے۔

(جاری ہے)

کاروبارِ زندگی بری طرح متاثر ہوا ہے، تقریباََ ہر شعبہ ہائے زندگی پر اس وباء نے گہری چھاپ چھوڑی ہے۔ اسی وباء کا شکار پاکستانی تارک وطن محمد ابوبکر شریف بھی ہوا ہے جس سے کورونا نے سب کچھ چھین لیا ہے۔ خلیج ٹائمز کی ایک رپورٹ کے مطابق پاکستانی تارک وطن محمد ابوبکر شریف جوکہ اپنے کنبے کے ہمراہ ابوظہبی میں ایک مطمئن زندگی بسر کر رہا تھا، کورونا وباء نے اس سے سب کچھ چھین لیا ہے۔

رپورٹس کے مطابق محمد ابوبکر شریف کے والد نے آج سے 32 سال قبل ابوظہبی ہمدان اسٹریٹ میں الحبیب نام سے ایک ریستوران کھولا۔ محمد ابوبکر ابوظہبی میں ہی پیدا ہوا، وہیں پلا بڑا اور جوان ہو کر اسی ریستوران کی بھاگ دوڑ سنبھال لی۔ خلیج ٹائمز سے گفتگو کرتے ہوئے محمد ابوبکر شریف کا کہنا تھا کہ انہوں نے کبھی سوچا بھی نہ تھا کہ ان کے ساتھ ایسا ہو سکتا ہے۔

انہوں نے بتایا کہ سب کچھ ٹھیک سے چل رہا تھا اور کورونا کی عالمی وباء سے قبل تک کھانے کے آرڈرز بھی باقاعدگی سے آ رہے تھے۔