کمانڈرعراقی فضائیہ کا ائیر ہیڈ کوارٹرز اسلام آباد کا دورہ

اسلام آباد(اُردو پوائنٹ اخبارتازہ ترین - این این آئی۔ 13 اکتوبر2020ء) سربراہ عراقی فضائیہ میجر جنرل (پائلٹ)شہاب جاہد علی شکرچی نے اپنے وفد کے ہمراہ منگل کو ائیر ہیڈ کوارٹرز اسلام آباد کا دورہ کیا۔انکی آمد پر سربراہ پاک فضائیہ ائیر چیف مارشل مجاہد انور خان نے معزز مہمان کا استقبال کیا۔ پاک فضائیہ کے ایک چاق وچوبند دستے نے انہیں سلامی پیش کی۔

کمانڈر عراقی ائیر فورس نے پاک فضائیہ کے شہدا کو خراجِ عقیدت پیش کرنے کے لئے یاد گارِ شہدا پر پھولوں کی چادر چڑھائی۔کمانڈر عراقی فضائیہ نے ائیر چیف مارشل مجاہد انور خان سے تفصیلی ملاقات کی۔ دونوں سربراہان نے علاقائی سلامتی اور باہمی تعاون کے امور پر تبادلہ خیال کیا۔کمانڈرعراقی فضائیہ نے پاک فضائیہ کی پیشہ ورانہ مہارت کو سراہا اور پاک فضائیہ کی خود انحصاری کے میدان میں غیر معمولی ترقی کی تعریف کی۔

(جاری ہے)

پاک فضائیہ کے سربراہ نے پاکستان اورعراق کے درمیان برادرانہ تعلقات اور باہمی تعاون پر گفتگو کی۔ دونوں معزز شخصیات نے فضائی افواج کے درمیان بے مثال دوستانہ تعلقات کو نئی جہتوں سے روشناس کرانے کے عزم کا اعادہ کیا۔بعد ازاں کمانڈر عراقی فضائیہ نے جوائنٹ اسٹاف ہیڈ کوارٹرز راوالپنڈی کا دورہ کیا جہاں انہوں نے چیئرمین جوائنٹ چیفس آف سٹاف کمیٹی جنرل ندیم رضا سے ملاقات کی۔ملاقات کے دوران پیشہ وارانہ امور اور د ونوں ممالک کے مابین علاقائی سلامتی اور عسکری تعاون کے مزید فروغ پر تبادلہ خیال کیا گیا۔