بھارتی فوج کی ریاستی دہشت گردی میں مزید چارکشمیری نوجوان شہید

دونوجوانوں کو ضلع شوپیاں اوردوکو پلوامہ میں سرچ آپریشن کے دوران شہید کیا گیا،علاقہ مکینوں کا شدید احتجاج

منگل 20 اکتوبر 2020 16:05

سری نگر(اُردو پوائنٹ اخبارتازہ ترین - این این آئی۔ 20 اکتوبر2020ء) مقبوضہ کشمیر میں بھارتی فوج کی جارحیت میں مزید چارکشمیری نوجوان شہید ہوگئے جس کے بعد 8 روز میں شہید ہونے والوں کی تعداد 12 ہوگئی۔کشمیر میڈیا سروس کے مطابق قابض بھارتی فوج نے جنت نظیر وادی کے اضلاع شوپیاں اور پلوامہ میں سرچ آپریشن کے دوران گھر گھر تلاشی لی اور اس دوران ایک گھر پر اندھا دھند فائرنگ کرکے 4 نوجوانوں کو شہید کردیا۔

اس طرح سری نگر، شوپیاں، بڈگام، اور اننت ناگ میں کیے گئے آپریشن میں 10 کشمیری نوجوانوں کو شہید کیا جاچکا ہے جب کہ انسانی حقوق کی سنگین خلاف ورزی کرتے ہوئے بھارت نواز کٹھ پتلی انتظامیہ نے نوجوانوں کی شہادت کو مقابلہ ظاہر کرنے کی کوشش کی اور لاشیں لواحقین کے حوالے کرنے سے انکار کردیا۔

(جاری ہے)

جس پر علاقہ مکینوں نے شہدا کے اہل خانہ کے ہمراہ بھارتی جارحیت کے خلاف احتجاجی مظاہر کیا اور آزادی جدوجہد کشمیر کے حق میں نعرے لگائے۔

مظاہرین کو طاقت کے بل پر کچلنے کے لیے قابض بھارتی فوج نے آنسو گیس کی شیلنگ اور ہوائی فائرنگ کرکے 10 مظاہرین کو زخمی کردیا۔دریں اثنا شوپیاں اور سری نگر میں سینٹرل ریزرو پولیس فورس کی گاڑی پر دو الگ واقعات میں ہیڈگرنیڈ سے حملہ کیا گیا جس کے نتیجے میں مجموعی طور پر 3 اہلکار زخمی ہوگئے جن میں سے ایک کی حالت نازک ہے۔