بھارت کی نصف آبادی کا اگلے برس تک کورونا سے متاثر ہونے کا خدشہ، ملک میں اس وقت میں 76 لاکھ افراد کورونا وائرس میں مبتلا

منگل 20 اکتوبر 2020 21:28

نئی دہلی: (اُردو پوائنٹ اخبارتازہ ترین - آن لائن۔ 20 اکتوبر2020ء) ) بھارت کی نصف آبادی کا اگلے برس فروری تک کورونا وائرس سے متاثر ہونے کا امکان ہے۔ ملکی خبر رساں ادارے کے مطابق بھارت کی کورونا وائرس کی پروجیکیشن کمیٹی نے کہا ہے کہ آئندہ برس فروری تک ملک کی ایک ارب تیس کروڑ کی آبادی میں سے لگ بھگ نصف کے کورونا وائرس سے متاثر ہونے کا امکان ہے۔

اس وقت بھارت میں 76 لاکھ افراد کورونا وائرس میں مبتلا ہوچکے ہیں اور یہ امریکا کے بعد دوسرا سب سے زیادہ وبا سے متاثرہ مریضوں کی تعداد والا ملک ہے۔

(جاری ہے)

کورونا وبا کے آغاز میں بھارت میں وائرس سے متاثرہ کیسز کی تعداد میں خاصی کمی دیکھی گئی تھی ، خصوصا اموات کی شرح امریکہ جیسے ترقی یافتہ ملک کے مقابلے بہت کم تھی، تاہم ماہرین نے اس کی وجہ یوں بتائی کہ بھارت میں کورونا ٹیسٹ ہی محدود پیمانے پر کئے جارہے ہیں جس کے سبب کورونا سے ہونے والی ہلاکتوں کی رپورٹنگ ہی نہیں ہو رہی۔

بھارتی اپوزیشن مودی سرکار کو کورونا کے حوالے سے مناسب اقدامات نہ اٹھانے پر تنقید کا نشانہ بناتی رہی ہے، حزب اختلاف پارٹی کانگریس کے رہنما راہول گاندھی نے وزیراعظم نریندر مودی پر تنقید کرتے ہوئے کہا ہے کہ ذ*بھارت کی نسبت پاکستان نے کوویڈ 19 کا زیادہ بہتر انداز میں مقابلہ کیا۔