حکومت حفیظ سنٹر کے تاجروں کو ریلیف دینے کیلئے تمام مراحل کا بیک وقت آغاز کرے‘ آل پاکستان انجمن تاجران

دوبارہ کاروبار کا آغاز ہونے میں وقت لگے گا،حکومت متاثرہ تاجروں،ملازمین کیلئے امدادی پیکج سے فنڈز جاری کرے

بدھ 21 اکتوبر 2020 12:42

حکومت حفیظ سنٹر کے تاجروں کو ریلیف دینے کیلئے تمام مراحل کا بیک وقت ..
لاہور(اُردو پوائنٹ اخبارتازہ ترین - این این آئی۔ 21 اکتوبر2020ء) آل پاکستان انجمن تاجران کے مرکزی صدر اشرف بھٹی نے کہاہے کہ حفیظ سنٹر کے متاثرہ تاجروں کو ریلیف دینے کیلئے پیچیدگیوںکو دور کر کے تمام مراحل کا بیک وقت آغاز کیا جائے ، آتشزدگی سے صرف تاجر ہی نہیںبلکہ دکانوں پرکام کرنے والے سینکڑوں ملازمین بھی بیروزگار ہو گئے ہیں ، حکومت متاثرہ تاجروں اور ملازمین کیلئے امدادی پیکج سے فوری طور پر کچھ فنڈز جاری کرے ۔

ان خیالات کااظہار انہوںنے اپنے دفتر میں عہدیداروں کے اجلاس سے خطاب کرتے ہوئے کیا ۔ انہوں نے کہا کہ حکومتی ادارے ٹیکسزتو وصول کرتے ہیںلیکن سہولیات فراہم نہیںکرتے ، اگر ذمہ دار ادارے حفیظ سنٹر میں آگ سے بچائو کیلئے پیشگی اقدامات کا جائزہ لیتے تو آج یہ دن نہ دیکھنا پڑتا۔

(جاری ہے)

انہوںنے کہا کہ انار کلی سمیت دیگر بازاروں اور تجارتی مراکز میں بجلی کی بے ہنگم اورلٹکی ہوئی تاریں ایسے ہی کسی حادثے کا سبب بن سکتی ہیں لیکن مطالبات کے باوجود اس پر توجہ نہیں دی جارہی ۔

تجاوزات کا مسئلہ بھی جوں کا توں ہے اور حادثات کے بعد یہی تجاوزات امدادی سر گرمیوں میں رکاوٹ بنتی ہیں۔ انہوںنے کہا کہ لاہور چیمبر سمیت تمام تاجر تنظیموںنے حفیظ سنٹر کے تاجروںکیلئے آواز اٹھائی ہے اور ہم حکومت کواس میں غیر ضروری تاخیر نہیں کرنے دیں گے ۔