صدارتی آرڈی نینسز کیخلاف کیس، رضا ربانی نے تحریری جواب ہائیکورٹ میں جمع کرادیا

آئینی تقاضے پورے کیئے بغیر جاری کیا جانے والا صدارتی آرڈیننس منسوخ کیا جا سکتا ہے، جواب

ہفتہ 24 اکتوبر 2020 16:30

اسلام آباد (اُردو پوائنٹ اخبارتازہ ترین - این این آئی۔ 24 اکتوبر2020ء) صدارتی آرڈی نینسز کے اجراء کے خلاف کیس میں عدالتی معاون پاکستان پیپلز پارٹی کے سینیٹر رضا ربانی نے اسلام آباد ہائی کورٹ میں 61 صفحات پر مشتمل تحریری جواب جمع کرا دیا۔پاکستان پیپلز پارٹی کے سینیٹر رضا ربانی نے بطور عدالتی معاون اسلام آباد ہائی کورٹ میں تحریری جواب جمع کرایا ہے کہ آئین کے مطابق صدر مملکت کابینہ کی تجویز پر غیرمعمولی حالات میں پارلیمنٹ اجلاس نہ ہونے پر آرڈیننس جاری کر سکتے ہیں، آئینی تقاضے پورے کیئے بغیر جاری کیا جانے والا صدارتی آرڈیننس منسوخ کیا جا سکتا ہے۔

جمع کرائے گئے جواب میں انہوں نے کہا کہ آئینی تقاضے پورے کیئے بغیر جاری کیا جانے والا آرڈیننس منسوخ کیا جا سکتا ہے۔

(جاری ہے)

میاں رضا ربانی نے کہا کہ آئینی تقاضے پورے کئے بغیر جاری کیا گیا آرڈیننس خلافِ آئین ہے، اس کی کوئی قانونی حیثیت نہیں۔جمع کرائے گئے جواب میں پیپلز پارٹی کے سینیٹر نے کہا کہ آئین سنگین اور ناگزیر حالات میں پارلیمنٹ کا اجلاس نہ ہونے پر صدر کو محدود اختیار دیتا ہے۔

رضا ربانی نے اپنے جمع کرائے گئے جواب میں کہا ہے کہ صدر کے بدنیتی پر مبنی اور غیرمتعلقہ بنیادوں پر جاری کردہ آرڈیننس پر سوال اٹھایا جا سکتا ہے۔جمع کرائے گئے جواب میں انہوں نے کہا کہ سینیٹ کا طے شدہ اجلاس نہ بلا کر آرڈیننس جاری کرنے سے صاف ظاہر ہے کہ فی الفور آرڈیننس کی ضرورت نہ تھی۔میاں رضا ربانی کا اپنے جمع کرائے گئے جواب میں کہنا ہے کہ آرڈیننس مقننہ میں ہونے والی بحث اور بات چیت کو بائی پاس کرنے کیلئے جاری کیا گیا۔