کسانوں کے لئے پیکج پر کام جاری ہے‘ گندم کی امدادی قیمت کا ابھی فیصلہ نہیں ہوا۔غلام سرور خان

بدھ 28 اکتوبر 2020 15:19

اسلام آباد (اُردو پوائنٹ اخبارتازہ ترین - اے پی پی۔ 28 اکتوبر2020ء) وفاقی وزیر ہوا بازی غلام سرور خان نے کہا ہے کہ کسانوں کے لئے پیکج پر کام جاری ہے‘ گندم کی امدادی قیمت کا ابھی فیصلہ نہیں ہوا۔ بدھ کو قومی اسمبلی میں خواجہ آصف کے نکتہ اعتراض کا جواب دیتے ہوئے غلام سرور خان نے کہا کہ کل کابینہ میں گندم کی قیمت کا جائزہ لیا ہے لیکن فیصلہ نہیں ہوا ہے۔

(جاری ہے)

امدادی قیمت کے حوالے سے تین صوبوں نے اپنی تجاویز بھجوا دی ہیں۔ سندھ حکومت نے اپنی سفارشات نہیں بھجوائیں۔ کابینہ نے کمیٹی بنائی ہے۔ حکومت زراعت کے شعبہ کے لئے ایک پیکج دینا چاہتی ہے۔ اس میں بیج اور کھادیں سبسڈائز ریٹ پر فراہم کی جائیں گی۔ انہوں نے کہا کہ سپیکر نے زراعت سے متعلق کمیٹی بھی بنائی ہے جس میں سب کو نمائندگی حاصل ہے۔ اس کمیٹی کی سفارشات پر عمل ہوگا۔