چوتھی عالمی اسلامک بینکنگ اینڈ فائنانس کانفرنس

کراچی (اُردو پوائنٹ اخبارتازہ ترین - این این آئی۔ 24 نومبر2020ء) بینک اسلامی کے صدر اور سی ای او سید عامر علی نے مالیاتی اور بینکنگ شعبہ میں تمام اسٹیک ہولڈرز پر زور دیا ہے کہ وہ وباء کے تناظر میں پیش آنے والے اقتصادی بحرانوں سے نمٹنے کے لئے حل، ماڈلز اور طریقہ کار وضع کریں۔ ان خیالات کا اظہار انہوں نے انسٹیٹیوٹ آف بزنس مینجمنٹ (IoBM) میں چوتھی بین الاقوامی اسلامک بینکنگ اینڈ فائنانس کانفرنس میں مہمان مقرر کی حیثیت سے خطاب کرتے ہوئے کیا۔

اداروں کے کردار کے حوالے سے سید عامر علی نے کہا کہ کاروبار اور افراد کی مالی ضروریات کیلئے سود سے پاک حل کی ضرورت اور طلب بڑھ رہی ہے۔ اسلامی بینکنگ یقینی طور پر آگے بڑھنے کا ایک راستہ ہے۔ انہوں نے کہا کہ اگر اسلامی مالیاتی اداروں کی کوئی طلب ہے تو ہم اسے پورا کرنے کے لئے تیار ہیں۔

(جاری ہے)

سید عامر علی نے بتایا کہ اسلامی بینکنگ انڈسٹری کے اثاثہ جات میں جولائی 2019ء سے جون 2020ء تک 21 فیصد اضافہ ہوا۔

اب اسلامی بینکنگ اداروں کے زیر انتظام اثاثوں کی مالیت 3.6 ٹریلین روپے سے زیادہ ہے۔ اس کے علاوہ ڈیپازٹس بھی تقریباً 3 ٹریلین روپے ہیں۔ اس کے ساتھ پاکستان میں اسلامی بینکاری کا حصہ 16.9 فیصد ہے۔ سی ای او نے مزید کہا کہ بحیثیت قوم ہمیں اپنا کردار مسئلہ تلاش کرنے والوں کی بجائے حل فراہم کرنے والوں کی طرف منتقل کرنے کی ضرورت ہے۔ ہم بہتر طریقے سے چیزیں تلاش کرتے ہیں لیکن ہمیں حل فراہم کنندہ بننے کی ضرورت ہے۔

انہوں نے ایس ایم ایز کو کریڈٹ گارنٹیز فراہم کرنے کی ضرورت پر زور دیا تاکہ یہ شعبہ اپنے پائوں پر کھڑا ہو سکے۔ بینک اسلامی 114 سے زائد شہروں میں 340 سے زائد برانچوں کے ساتھ جدید ترین ٹیکنالوجی کے حامل بینکوں میں شامل ہے۔ بینک وباء کے اثرات کے خاتمے کے لئے اپنا کردار ادا کر رہا ہے جس میں ٹیسٹنگ کٹس اور PPEs کے عطیات اور ادارہ جاتی صلاحیتوں کو اجاگر کرنا ہے۔