ڈی ڈبلیو 
اسلام آباد (اُردو پوائنٹ ۔ DW اردو۔ 28 نومبر 2020ء) امریکی گلوکارہ چَیر کو پوپ موسیقی کی دیوی (Goddess) کہا جاتا ہے۔ 74 سالہ آرمینیائی نژاد گلوکارہ نے فلموں میں بھی اداکاری کی ہے۔ ان کا فلمی اور گلوکاری کا عہد چھ دہائیوں پر محیط رہا ہے۔
سکیورٹی خدشات کے تناظر میں ان کے پاکستانی دورے کو عام نہیں کیا گیا۔ انہوں نے گزشتہ روز اسلام آباد میں وزیر اعظم عمران خان سے بھی ملاقات کی۔
ان کو پاکستانی وزیر اعظم نے ملک میں ماحول دوست منصوبوں اور کلائمیٹ چینج کے حوالے سے ملکی ترجیحات کے بارے میں بتایا۔کاوان سے ملاقات
چَیر کے پاکستانی دورے کا اہم ترین مقصد اسلام آباد کے چڑیا گھر کے ہاتھی کاوان سے ملاقات ہے۔ کاوان کو اتوار انتیس نومبر کو کمبوڈیا میں قائم ہاتھیوں کے ایک نیشنل پارک روانہ کیا جا رہا ہے۔
(جاری ہے)
کاوان کی تربیت اور صحت میں بہتری کے لیے جانوروں کی نگہداشت کی بین الاقوامی غیر حکومتی تنظیم 'فور پاز‘ کے نمائندے بھی پاکستان میں ہیں۔ ان ماہرین نے کاوان کے علاج کے ساتھ ساتھ اس کی خصوصی تربیت بھی کی تا کہ وہ بحفاظت کمبوڈیا کا سفر مکمل کر سکے۔
اسلام آباد کا چڑیا گھر اور کاوان کی حالت
کاوان کو پینتیس برس اسلام آباد کے چڑیا گھر میں زنجیر کے ساتھ باندھ کر رکھا گیا تھا۔ اس کی ساتھی ہتھنی سن 2012 میں بدن کے گلنے سڑنے کے مہلک انفیکشن سے مر گئی تھی۔ افسوس ناک بات یہ تھی کہ اس کا مردہ جسم کئی دنوں تک کاوان کے قریب ہی پڑا رہا اور اس کے انتہائی منفی اثرات نے نر ہاتھی کو اپنی گرفت میں لے لیا تھا۔
مزید پڑھیے: پاکستان میں زنجیریں تھیں جس کا مقدر، اب کمبوڈیا میں آزاد پھرے گا
غیر حکومتی تنظیم 'فور پاز‘ کے ڈاکٹر عامر خلیل کا کہنا ہے کہ جب وہ پاکستان آئے تھے تو کاوان انتہائی پژمردہ، بیمار اور نفسیاتی اعتبار سے کمزور ہو چکا تھا۔ جانوروں کے حقوق کے سرگرم افراد نے کاوان کو دنیا کا 'تنہا اور اکیلا ہاتھی‘ قرار دے رکھا تھا۔
ڈاکٹر عامر خلیل نے کاوان کے کئی زخموں کا مکمل علاج کیا۔کاوان کی کمبوڈیا منتقلی میں 'فور پاز‘ بھی شامل ہے اور اس کے اہلکار اُسے نئی منزل تک پہنچا کر واپس جائیں گے۔ فور پاز کے مطابق کمبوڈیا کے ایلیفینٹ نیشنل پارک منتقلی کے بعد بھی کاوان کا جسمانی اور نفسیاتی علاج جاری رکھا جائے گا۔
کاوان پر دستاویزی فلم
کاوان کے حق میں امریکی گلوکارہ چَیر نے بھی اور لوگوں کے ساتھ مل کے بھرپور آواز بلند کی تھی۔
انہوں نے کاوان کی زندگی پر ایک دستاویزی فلم بنانے کا بھی اعلان کر رکھا ہے۔ وزیر اعظم عمران خان سے ملاقات کے دوران چَیر نے کاوان کے علاج اور اس کی کمبوڈیا منتقلی کے فیصلے اور حکومتی کاوشوں کو سراہا۔فور پاز کے ماہرین گزشتہ تین ماہ سے کاوان کا علاج جاری رکھے ہوئے ہیں۔ علاج کے دوران اُسے سبزیاں اور پھل بطور خوراک دیے گئے۔ فور پاز تنظیم نے چَیر جیسی بڑی میڈیا شخصیات کے جانوروں کے حقوق کے لیے آواز بلند کرنے کو ایک احسن اقدام قرار دیا ہے۔
ع ح، ع آ (اے پی)
