ڈی ڈبلیو 
اسلام آباد (اُردو پوائنٹ ۔ DW اردو۔ 01 دسمبر 2020ء) فارمولا ون کے منتظم ادارے ایف آئی اے نے تصدیق کر دی ہے کہ سات مرتبہ کے عالمی چیمپئن لوئیس ہیملٹن کا کووڈ ٹیسٹ پازیٹو آیا ہے اور یوں وہ آئندہ ویک اینڈ پر بحرین میں ہونے والی الصخیر گراں پری میں شرکت نہیں کریں گے۔
مرسیڈیز ٹیم نے کہا ہے کہ اس ریس کے لیے لوئیس ہیمٹن کی جگہ کسی اور ڈرائیور کو موقع دیا جائے گا۔
مرسیڈیز کی طرف سے جاری کیے گئے بیان میں مزید کہا گیا کہ کووڈ کا شکار ہونے کے بعد ہیملٹن قرنطینہ میں ہیں۔ایف آئی اے نے کہا ہے کہ ہیملٹن کےکورونا وائرس کا شکار ہونے کے باعث بحرین گراں پری متاثر نہیں ہو گی بلکہ یہ پروگرام کے مطابق ہی منعقد کی جائے گی۔
اس بیان میں مزید کہا گیا، ''کووڈ انیس کے پروٹوکولز اور پبلک ہیلتھ اتھارٹی گائیڈ لائنز کے مطابق اب ہیملٹن تنہائی میں چلے گئے ہیں۔
(جاری ہے)
مرسیڈیز ٹیم نے بتایا ہے کہ پینتیس سالہ ہیملٹن میں کووڈ کی ‘ہلکی علامات‘ نوٹ کی گئی ہیں۔ بتایا گیا ہے کہ تاہم وہ 'فٹ اور تندرست‘ ہیں، ''وہ پیر کی صبح جاگے تو ان کی طبعیت ناساز تھی اور انہوں نے فوری طور پر متعلقہ حکام کو مطلع کر دیا۔
ٹیسٹ کے بعد وہ کورونا میں مبتلا پائے گئے۔مرسیڈیز ٹیم نے مزید بتایا کہ فارمولا ون کے سخت قوانین کے تحت گزشتہ ہفتے کے دوران برطانوی ڈرائیور ہیملٹن کا تین مرتبہ کووڈ ٹیسٹ کیا گیا تھا۔
فارمولا ون کے کووڈ متاثرہ رواں سیزن میں بھی ہیملٹن سب سے آگے ہیں۔ پوائنٹس ٹیبل پر وہ گیارہ ریسیں جیت کر 332 پواینٹس حاصل کر چکے ہیں جبکہ دوسرے نمبر پر مرسیڈیز ٹیم کے ہی ڈرائیور ولاری بوٹاس ہیں، جنہوں نے دو ریسیں جیت کر 201 پوائنٹس حاصل کر رکھے ہیں۔
ریڈ بل ٹیم کے ڈرائیور ماکس فرسٹاپن 189پوائنٹس کے ساتھ تیسرے نمبر پر ہیں جبکہ ابھی تک انہوں نے صرف ایک ہی ریس میں کامیابی حاصل کی ہے۔
گراں پری کے سلسلے میں ایک ریس جیتنے والے ڈرائیور کو پچیس پوائنٹس ملتے ہیں جبکہ دوسرے نمبر پر آنے والے کو اٹھارہ اور تیسری پوزیشن حاصل کرنے والے ڈرائیور کو پندرہ پوائنٹس دیے جاتے ہیں۔
ع ب / ع س / خبر رساں ادارے
