جج وڈیو کیس کے ملزم فیصل شاہین کی درخواست ضمانت پر ایف آئی اے کو نوٹس جاری ،جواب طلب

منگل 1 دسمبر 2020 20:19

اسلام آباد(اُردو پوائنٹ اخبارتازہ ترین - آن لائن۔ 01 دسمبر2020ء) اسلام آباد ہائی کورٹ کے جسٹس عامرفاروق اور جسٹس غلام اعظم قمبرانی پر مشتمل ڈویڑن بنچ نے جج وڈیو کیس کے ملزم فیصل شاہین کی درخواست ضمانت پر ایف آئی اے کو نوٹس جاری کرتے ہوئے جواب طلب کرلیا۔

(جاری ہے)

گذشتہ روز سماعت کے دوران درخواست گزار وکیل کا کہناتھاکہ ناصر بٹ نے جج ارشد ملک کیساتھ ملاقات کی وڈیودھوکہ سے بنوائی، ناصر بٹ نے بزنس میٹنگ کا کہہ کر دھوکے سے وڈیو بنوائی،مریم نواز، شہباز شریف سمیت ن لیگ کے دیگر رہنماؤں کی نہ گرفتاری اور نہ ہی ان سے تحقیقات ہوئیں،دوران تفتیش مجھے ایف آئی آر میں نامزد کیا گیا،مرکزی ملزم میاں طارق سمیت دیگر کی ضمانت ہو چکی،تین اکتوبر 2019 سے اڈیالہ جیل میں قید ہوں، ضمانت پر رہا کیا جائے، عدالت نے مذکورہ بالا اقدامات کے ساتھ سماعت ملتوی کردی۔