کرونا وائرس ،عالمی سطح پر ایک ہفتے میں ہونے والی ہلاکتیں فی روز 10 ہزار سے تجاوز کرگئی

سب سے زیادہ متاثر ہونے والے ممالک میں امریکا اور بھارت شامل ہیں، رپورٹ جاری

جمعہ 4 دسمبر 2020 20:14

نیویارک (اُردو پوائنٹ اخبارتازہ ترین - این این آئی۔ 04 دسمبر2020ء) عالمی سطح پر گزشتہ ایک ہفتے میں ہونے والی ہلاکتیں فی روز 10 ہزار سے تجاوز کرگئی ہیں جو کہ ہلاکت خیز وبا کے آغاز سے تاحال ایک ریکارڈ ہے۔عالمی میڈیا کے مطابق عالمی وبا کی دوسری لہر نے شدت اختیار کرلی ہے، گزشتہ ایک ہفتے کے دوران ہر 9 سیکنڈ میں ایک ہلاکت ہوئی ،یومیہ ہلاکتوں کی تعداد 10 ہزار سے تجاوز کرگئی ہے۔

(جاری ہے)

گزشتہ دو ماہ سے کورونا کی شدت میں بے پناہ اضافہ ہوا ہے اور اس دوران ہلاک ہونے والوں کی تعداد 5 لاکھ سے تجاوز کرگئی ہے۔ سب سے زیادہ متاثر ہونے والے ممالک میں امریکا اور بھارت شامل ہیں۔دوسری جانب برطانیہ، چین، روس اور امریکا کی کمپنیوں نے کورونا ویکسین کی تیاری کا دعویٰ کیا ہے اور امریکی کمپنی فائزر کی ویکسین کو برطانیہ میں عام استعمال کے لیے اجازت دیدی گئی ہے۔ادھر اقوام متحدہ نے ویکسین کی دنیا بھر میں منصفانہ تقسیم کیلئے COVAXنامی ادارہ تشکیل دیا ہے جب کہ جنرل سیکرٹری یو این نے دنیا سے پیداوار کا دس فیصد تک امدادی فنڈ میں جمع کرانے کی اپیل کی ہے جس سے متاثرہ ممالک اور قرض میں ڈوبے ممالک کی مدد کی جا سکے گی۔