سابق وزیرداخلہ سینیٹر رحمان ملک کی ہمشیرہ کے انتقال پر ڈاکٹر فوزیہ صدیقی کا اظہار تعزیت

منگل 12 جنوری 2021 17:12

کراچی (اُردو پوائنٹ اخبارتازہ ترین - این این آئی۔ 12 جنوری2021ء) قوم کی بیٹی ڈاکٹر عافیہ کی ہمشیرہ اور عافیہ موومنٹ کی رہنما ڈاکٹر فوزیہ صدیقی نے سابق وفاقی وزیرداخلہ سینیٹر رحمان ملک کی ہمشیرہ کے انتقال پر اسلام آبادمیں واقع ان کی رہائش گاہ پر جا کر اظہار تعزیت کیا اور مرحومہ کی مغفرت و درجات کی بلندی کیلئے فاتحہ خوانی کی۔ اس موقع پر چیئرمین سینیٹ صادق سنجرانی اور پاکستان پیپلز پارٹی کے مرکزی رہنما قمرزمان کائرہ بھی موجود تھے۔

(جاری ہے)

ڈاکٹر فوزیہ صدیقی کے ہمراہ عافیہ موومنٹ لاہور اور پی ڈی پی کے رہنما اعظم منہاس، خلیل احمد آسی اور عبداللہ منصور بھی تھے۔ سینیٹر رحمان ملک نے قوم کی بیٹی ڈاکٹر عافیہ کی وطن واپسی کیلئے ڈاکٹر فوزیہ صدیقی کی جدوجہد کو سراہتے ہو ئے پیپلزپارٹی کی جانب سے بھرپور تعاون کا اعادہ کیا۔ انہوں نے اس بات پر افسوس کا اظہار کیا کہ پاکستان تحریک انصاف کی حکومت میں ڈاکٹر عافیہ کی وطن واپسی کا معاملہ مزید تاخیر کا شکار ہوگیا ہے۔ رحمان ملک نے ڈاکٹر عافیہ کی جلد واپسی کیلئے سینیٹ میں بھرپور آواز بلند کرنے کی یقین دہانی بھی کرائی۔