الیکشن کمیشن کی سینیٹ الیکشن اوپن بیلٹ سے کرانے کی مخالفت

خفیہ بیلٹ ختم کرنے کیلئے آئینی ترمیم کرنا ہوگی، آرٹیکل 226 واضح ہے کہ وزیراعظم اور وزیراعلی کے علاوہ تمام انتخابات خفیہ رائے شماری سے ہونگے،سپریم کورٹ میں جواب جمع

ہفتہ 16 جنوری 2021 19:57

الیکشن کمیشن کی سینیٹ الیکشن اوپن بیلٹ سے کرانے کی مخالفت

اسلام آباد(اُردو پوائنٹ اخبارتازہ ترین - آن لائن۔ 16 جنوری2021ء) الیکشن کمیشن نے سینیٹ انتخابات اوپن بیلٹ سے کرانے کی مخالفت کرتے ہوئے اپنا جواب سپریم کورٹ میں جمع کروا دیا ۔

(جاری ہے)

تفصیلات کے مطابق الیکشن کمیشن نے صدارتی ریفرنس کی مخالفت کرتے ہوئے سپریم کورٹ میں 12صفحات پر مشتمل جواب جمع کروادیا کہ سینیٹ انتخابات آئین کے تحت ہی ہوتے ہیں، آرٹیکل 226 واضح ہے کہ وزیراعظم اور وزیراعلی کے علاوہ تمام انتخابات خفیہ رائے شماری سے ہونگے، آئین کے آرٹیکلز 59، 219 اور 224 میں سینیٹ انتخابات کا ذکر ہے، آئین میں کٴْل 15 انتخابات کا ذکر ہے اور اس میں صرف وزیراعلی اور وزیراعظم کے انتخابات کو ہی اوپن کیا گیا ہے،ارکان قومی اورصوبائی اسمبلی کی ترجیحات کوظاہرنہیں کیاجاسکتا۔

الیکشن کمیشن نے جواب میں کہا کہ انڈین آئین میں سیکرٹ بیلٹ کا ذکر موجود نہیں، بھارتی عدالتوں نے انڈین آئین میں سیکرٹ بیلٹ کے ذکر موجود نہ ہونے پر انحصار کیا ہے۔الیکشن کمیشن نے مزید کہاکہ خفیہ بیلٹ ختم کرنے کیلئے آئینی ترمیم کرناہوگی،سینیٹ انتخابات صدر،وزیراعظم کے انتخابات کی مانندآئین کے تحت ہیں۔