یوٹیوب نے ڈونلڈ ٹرمپ پر عائد پابندی میں توسیع کردی

سابق امریکی صدر اپنے یوٹیوب چینل پر مزید 7 روز تک کوئی ویڈیو اپ لوڈ نہیں کرسکیں گے،انتظامیہ

بدھ 20 جنوری 2021 14:49

نیویارک (اُردو پوائنٹ اخبارتازہ ترین - این این آئی۔ 20 جنوری2021ء) ویڈیو اسٹریمنگ سائٹ یوٹیوب نے ڈونلڈ ٹرمپ پر عائد پابندی میں توسیع کردی۔غیر ملکی میڈیا کے مطابق یوٹیوب کی جانب سے جاری بیان میں کہا گیا ہیکہ ڈونلڈ ٹرمپ پر عائد پابندی میں توسیع کی جارہی ہے جس کے بعد وہ اپنے یوٹیوب چینل پر مزید 7 روز تک کوئی ویڈیو اپ لوڈ نہیں کرسکیں گے اور نہ ہی لائیو اسٹریمنگ کی جاسکے گی۔

(جاری ہے)

یوٹیوب نے کیپیٹل ہل حملے پر ٹرمپ کے رد عمل کو دیکھتے ہوئے ان کے یوٹیوب چینل پر 12 جنوری کو پابندی عائد کی تھی جس میں یوٹیوب کا کہنا تھا کہ امریکی صدر نے تشدد سے متعلق ان کی پالیسی کی خلاف ورزی کی ہے۔ٹرمپ پر عائد پابندی میں توسیع پر یوٹیوب نے مزید کہا کہ ٹرمپ کے چینل کی معطلی میں توسیع موجودہ کشیدہ اور پرتشدد حالات کے پیش نظر کی گئی ہے۔خیال رہے کہ کیپیٹل ہل حملے کے بعد ٹرمپ کے بیانات پر ان کا ٹوئٹر اکائونٹ مستقل بند کیا جاچکا ہے جب کہ وہ انسٹاگرام اور فیس بک سمیت اسنیپ چیٹ پر بھی بلاک ہیں۔