حریت رہنمائوں اور تنظیموں کا شہدائے گائوکدل کو خراج عقیدت

سرینگر۔ (اُردو پوائنٹ اخبارتازہ ترین - اے پی پی۔ 20 جنوری2021ء) بھارت کے غیر قانونی زیر تسلط جموںوکشمیرمیں حریت رہنمائوں اور تنظیموں نے 1990کے سانحہ گائو کدل کے شہداکی 31ویں برسی کے موقع پر انہیں زبردست خراج عقیدت پیش کیا ہے ۔ کشمیرمیڈیاسروس کے مطابق تحریک مزاحمت کے چیئرمین بلال احمد صدیقی نے ایک بیان میں کل جمعرات کو سرینگر میں مکمل ہڑتال کی اپیل کااعادہ کرتے ہوئے کہا ہے کہ سانحہ گاکدل بھارتی فوجیوںکی طرف سے مقبوضہ جموںوکشمیرمیں قتل عام کے بدترین واقعات میں سے ایک ہے ۔

انہوںنے جنوری کے مہینے کو کشمیریوں کیلئے مہلک ترین مہینہ قراردیتے ہوئے کہاکہ گائو کدل ، سوپور ، کپواڑہ اور ہندواڑہ جیسے کشمیریوں کے قتل عام کے بدترین واقعات جنوری کے مہینے میں ہی رونا ہوئے ہیں جن میں سینکڑوںکشمیریوں کو شہید کیاگیا۔

(جاری ہے)

حریت رہنماجاوید احمد میر نے ایک بیان میں کہاکہ کشمیری عوام نے اپنے ناقابل تنسیخ حق ، حق خودارادیت کیلئے بے مثال قربانیاں پیش کی ہیں۔

انہوں نے کہاکہ شہدائے گائو کدل نے بھارت کے غیر قانونی تسلط سے آزادی کیلئے اپنی جانوںکا نذرانہ پیش کیا۔ انہوں نے عالمی برادری پر زوردیا کہ وہ کشمیری عوام کو درپیش مشکلات دور کرانے کیلئے اپنی ذمہ داریاں پوری کرے ۔ اسلامی تنظیم آزادی کے سربراہ عبدالصمد انقلابی نے سرینگر سے جاری ایک بیان میں سانحہ گائوکدل کو مقبوضہ جموںوکشمیر کی تاریخ کا سیاہ ترین باب قراردیا۔

انہوں نے افسوس ظاہر کیاکہ سانحے کے متاثرہ خاندان آج بھی انصاف کے منتظر ہیں۔ جموںوکشمیر تحریک استقلال کے نائب چیئرمین مشتاق احمد بٹ اور جنرل سیکریٹری عبدالحمید نے ایک مشترکہ بیان میں کہاکہ کشمیری شہدانے بھارتی تسلط سے آزادی کے مقدس مشن کیلئے اپنی جانوںکا نذرانہ پیش کیا ہے ۔ انہوں نے شہدا کے اہلخانہ سے مکمل ہمدردی اوریکجہتی کا اظہار کرتے ہوئے کہاکہ قابض بھارتی فوج روزانہ کی بنیاد پروادی کشمیرمیں نہتے کشمیریوں کے خون سے ہولی کھیل رہی ہے ۔

جموںوکشمیر ڈیموکریٹک پولٹیکل موومنٹ نے شہدائے گائو کدل کی یاد میں بارہمولہ میں ایک دعائیہ مجلس کا اہتمام کیا جس کی صدارت پارٹی کے جنرل سیکرٹری پیر ہلال احمد نے کی۔پیر ہلال احمد نے اس موقع پر کہا کہ بھارتی فوج نے گزشتہ تین دہائیوں کے دورا ن مقبوضہ جموںو کشمیر میں بڑے پیمانے پر کشمیریوں کا قتل عام کیا۔ انہوں نے کہا کہ کشمیری شہداکی قربانیوں کو ہرگز رائیگاں نہیں ہونے دیا جائے گا۔ انہوں نے شہدائے گائو کدل سمیت تمام کشمیری شہداکے درجات کی بلندی کیلئے دعا کی۔