بھارت میں کسانوں کے احتجاج میں شدت آگئی، ٹریکٹر مارچ کی تیاریاں مکمل

خوفزدہ مودی سرکار نے ہریانہ پولیس کی چھٹیاں منسوخ کر دیں

جمعہ 22 جنوری 2021 21:44

نئی دہلی(اُردو پوائنٹ اخبارتازہ ترین - آن لائن۔ 22 جنوری2021ء) بھارت میں کسانوں کے احتجاج میں شدت آگئی ہے ، 26 جنوری کو دہلی کی طرف ٹریکٹر مارچ کی تیاریاں آخری مرحلے میں داخل ہو گئیں ہیں۔ خوف کا شکار مودی سرکار نے ہریانہ پولیس کی چھٹیاں منسوخ کر دیں ہیں۔

(جاری ہے)

بھارتی میڈیا کا کہنا ہے کہ یوم جمہوریہ کے موقع پر عالمی رہنماؤں نے شرکت سے انکار کر دیا ہے اور 55 سال میں پہلی مرتبہ کوئی بھی غیر ملکی صدر یا وزیراعظم یوم جمہوریہ میں شریک نہیں ہوگا۔

واضع رہے کہ برطانوی وزیراعظم بورس جانسن کے انکار کے بعد مودی سرکار نے یوم جمہوریہ پر کسی بھی غیر ملکی رہنما کو مہمان خصوصی کے طور پر نہ بلانے کا فیصلہ کیا ہے۔میڈیا رپورٹ کے مطابق مودی حکومت اپنی ناکامیوں اور اس بے عزتی کو چھپانے کے لیے عالمی وبا کو بہانہ بنا کر اپنی عوام کو بے وقوف بنا رہی ہے۔ برطانوی وزیراعظم بورس جانسن سمیت متعدد عالمی رہنماؤں نے بھارت کے یوم جمہوریہ کی دعوت کو ٹھکرا دیا ہے۔