کراچی ،کلفٹن میں ٹک ٹاک کے جنون نے پاک فوج کے جوان کی جان لے لی

اتوار 24 جنوری 2021 23:05

کراچی(اُردو پوائنٹ اخبارتازہ ترین - آن لائن۔ 24 جنوری2021ء) کلفٹن میں ٹک ٹاک کے جنون نے پاک فوج کے جوان کی جان لے لی، متوفی کوہاٹ میں تعینات اور 5 روز قبل چھٹی پر کراچی آیا تھا۔

(جاری ہے)

تفصیلات کے مطابق ماڈل تھانہ درخشاں وساحل کی حدود کلفٹن سی ویو پر بھاری بھرکم پتھر سر پر گرنے سی20 سالہ نوجوان عزیز ولد زبیر خان جاں بحق ہوگیا، جس کی لاش کلفٹن کے نجی اسپتال سے پوسٹ مارٹم کی کارروائی کیلئے جناح اسپتال منتقل کی گئی، پولیس کے مطابق متوفی پاک آرمی کا جوان تھا جو کہ کوہاٹ میں ڈیوٹی انجام دیتا تھا اور 5 روز قبل چھٹی پر کراچی آیا تھا ، متوفی اورنگی ٹائون سیکٹر 10 فقیر کالونی عثمانیہ محلے میں بابو ہوٹل کے قریب کا رہائشی تھا، متوفی4 بھائی اور دو بہنوں میں سب سے بڑا تھا، متوفی کے والد نے بتایا کہ وہ ٹریلر کے ڈرائیور ہیں ہفتہ کی شب تقریباً 9 بجے وہ کام سے گھر آئے تو عزیز اپنے رشتے داروں کے ساتھ کھاناکھانے میٹروول سائٹ جانے کا بول کر گیا تھا ، متوفی کے کزن نے پولیس افسر کو بتایا کہ واقعے کے وقت وہ بھی اس کے ساتھ تھا، سی ویو پر باب اقبال اور چنکی منکی کے درمیان میں پیلے رنگ کے بڑے بڑے پتھر بطور شو پیس رکھے گئے ہیں، عزیز اس پتھر پر چڑھ کر ٹک ٹاک بنانا چاہتا تھا اسے کافی منع کیا تاہم وہ نہیں مانا پتھر کے اوپر چڑھا تو وہ اپنا توازن برقرار نہ رکھ سکا اور پیچھے کی طرف گر گیا اس دوران پتھر بھی اس کے اوپر جا گرا جو جان لیوا ثابت ہوا، تاہم پولیس نے واقعے کی اتفاقیہ حادثہ قرار دیتے ہوئے ابتدائی کارروائی کے بعد لاش ورثا کے حوالے کردی۔