ہمیں تو روکا جاتا ہے مراد سعید کو ٹوکا تک نہیں جارہا، اپوزیشن سینیٹرز بول پڑے

ممبران آپ بات سنیں وزیر بھارت سے متعلق بات کررہے ہیں، چیئر مین سینٹ کا جواب

منگل 26 جنوری 2021 23:04

ہمیں تو روکا جاتا ہے مراد سعید کو ٹوکا تک نہیں جارہا، اپوزیشن سینیٹرز ..

اسلام آباد (اُردو پوائنٹ اخبارتازہ ترین - این این آئی۔ 26 جنوری2021ء) وزیر مملکت برائے مواصلات مراد سعید کی سینیٹ اجلاس میں طویل تقریر پر اپوزیشن ارکان نے احتجاج کرتے ہوئے کہا ہے کہ ہمیں تو روکا جاتا ہے مراد سعید کو ٹوکا تک نہیں جارہا۔ منگل کو سینیٹ اجلاس کے دوران اقلیتی رکن گیان چند نے کہا کہ ہمیں تقریر کیلئے وقت نہیں ملتا اور مراد سعید بہت دیر سے تقریر کررہے ہیں۔

سینیٹر گیان چند نے کہا کہ مراد سعید کی طویل تقریر سن کر ہم بور ہوگئے ہیں، یہ فضول بول رہے ہیں، ہمیں بھاشن نہ دیں۔

(جاری ہے)

انہوں نے کہاکہ وزیر اپنی وزارت سے متعلق بیان دیں، مراد سعید وزیراعظم نہیں ہیں۔اپوزیشن سینیٹر نے کہاکہ ہمیں تو لمبی تقریر کرنے پر روکا جاتا ہے، مراد سعید کو ٹوکا تک نہیں جارہا ہے۔چیئرمین سینیٹ صادق سنجرانی نے اپوزیشن سینیٹر کو مخاطب کرتے ہوئے کہاکہ ممبران آپ بات سنیں وزیر بھارت سے متعلق بات کررہے ہیں۔

مراد سعید نے دوران گفتگو کہا کہ نریندر مودی کو سابق وزیراعظم نے اپنی نواسی کی شادی پر بلایا تھا، یہ جندل کو بلا چکے ہیں، انہیں کلبھوش جادیو کا نام لیتے ہوئے شرم آتی ہے۔اپوزیشن کے احتجاج پر چیئرمین سینیٹ نے مراد سعید سے تقریر جلد ختم کرنے کی درخواست بھی کی۔