محکمہ زراعت کی جانب سے آم کے باغبانوں کو گدھیڑی کے فوری تدارک کی ہدایت

قصور (اُردو پوائنٹ اخبارتازہ ترین - اے پی پی۔ 18 فروری2021ء) محکمہ زراعت نے آم کے باغبانوں کو گدھیڑی کے فوری تدارک کی ہدایت کی ہے اورکہاہے کہ آم کی گدھیڑی کے انڈوں میں سے بچے نکلنا کاعمل شروع ہوگیاہے لہذا بچے کھچے انڈوں اور نئے نکلنے والے بچوں کی تلفی کےلئے آم کے پودوں کے گردہلکی گوڈی کی جائے تاکہ سورج کی تپش اور پرندوں کے چگنے سے ان کی تلفی ممکن ہوسکے۔

(جاری ہے)

ترجمان محکمہ زراعت نے”اے پی پی“ کو بتایا کہ باغبانوں کو چاہئیے کہ وہ تنے کے گرد زمین کو کھودکر اس میں سفارش کردہ زہرملادیں تاکہ انڈوں سے بچے نکلتے ہی زہر کے اثرسے فوری تلف ہوجائیں۔ انہوں نے بتایا کہ اگرپودوں کے تنوں پر چکنے رکاوٹی بندلگا دیئے جائیں تب بھی گدھیڑی کے بچے پودے پرنہ چڑھ پائیں گے اور بندسے چپک کر تلف ہوجائیں گے۔انہوں نے کہا کہ باغبان مٹی اور توڑی ملاکر درختوں کے تنوں پر لیپ کر سکتے ہیں تاہم لیپ کے بعد25.2سینٹی میٹر چوڑی پولی تھین شیٹ کابندلگانا بھی ضروری ہے نیزبند کے نچلے حصے پر موٹی رسی باندھ دینی چاہئیے۔انہوں نے کہا کہ گدھیڑی کا حملہ بہت شدید ہوتاہے جس سے آم کی پیداواری میں کمی بھی متوقع ہوتی ہے۔