آپریشن سوئفٹ ریٹارٹ؛ اسلام آباد میں پاک فضائیہ کے طیاروں کا فلائی پاسٹ

27 فروری 2019 کو پاکستان فضائیہ کے شاہینوں نے بھارتی جنگی طیارے تباہ کر کے مودی کا غرور خاک میں ملا دیا تھا، ائیر چیف

ہفتہ 27 فروری 2021 13:41

آپریشن سوئفٹ ریٹارٹ؛ اسلام آباد میں پاک فضائیہ کے طیاروں کا فلائی ..

اسلام آباد (اُردو پوائنٹ اخبارتازہ ترین - این این آئی۔ 27 فروری2021ء) آپریشن سوئفٹ ریٹارٹ کے 2 سال مکمل ہونے پر اسلام آباد میں پاک فضائیہ کے طیاروں نے فلائی پاسٹ کا شاندار مظاہرہ پیش کیا۔27 فروری 2019 کو پاکستان فضائیہ کے شاہینوں نے بھارتی جنگی طیارے تباہ کر کے مودی کا غرور خاک میں ملا دیا تھا۔ آپریشن سوئفٹ ریٹارٹ کے دو سال مکمل ہونے پر اسلام آباد ایئر ہیڈ کوارٹرز میں خصوصی تقریب ہوئی جس میں ایئر چیف مارشل مجاہد انور خان نے شرکت کی۔

اس موقع پر انہوں نے گارڈ آف آنر کا معائنہ کیا۔پاک فضائیہ کے طیاروں نے فلائی پاسٹ کا شان دار مظاہرہ کیا تو ان کی گھن گرج سے فضا گونج اٹھی اور دلوں پر رعب و ہیبت طاری ہوگئی۔ شائقین نے شاندار کاکردگی کا مظاہرہ کرنے پر پاک فضائیہ کے شاہینوں کو خوب داد دی۔

(جاری ہے)

ایئر چیف مارشل مجاہد انور خان نے تقریب سے خطاب کرتے ہوئے کہا کہ پاکستان امن پسند ملک ہے اور خطے میں سلامتی چاہتی ہے، دنیا نے دیکھا پاکستان نے امن کیلئے بھارتی پائلٹ کو واپس کیا، اپنی ذمے داریاں جانتے ہیں اور وطن عزیز کے دفاع کیلیے ہر لمحہ تیار ہیں۔

مجاہد انور خان نے کہا کہ آپریشن سوئفٹ ریٹارٹ کے ذریعے ہماری افواج نے وطن کا بھرپور دفاع کیا، ہماری افواج کو ملک کے دفاع کیلئے ہر لمحہ تیار رہنا ہوگا، اپنے دفاع سے بے خبر نہیں اور دشمن کی کسی بھی مہم جوئی کا فوری جواب دیا جائے گا۔