شہزاد رائے کے بچپن کے دوست کا امریکا سے کراچی آتے ہوئے اچانک انتقال

اتوار 28 فروری 2021 22:55

کراچی(اُردو پوائنٹ اخبارتازہ ترین - این این آئی۔ 28 فروری2021ء) معروف گلوکار و سماجی کارکن شہزاد رائے کے بچپن کے دوست کا امریکا سے کراچی آتے ہوئے انتقال ہوگیا۔سماجی رابطے کی ویب سائٹ ٹوئٹر پر شہزاد رائے نے اپنے دوست نواز سیانی کی آخری تصویر شیئر کی جس میں وہ دبئی ائیرپورٹ پر موجود ہیں۔شہزاد رائے نے اپنے ٹوئٹ میں لکھا کہ نواز سیانی میرے بچپن کا دوست تھا جو امریکا میں مقیم تھا۔

(جاری ہے)

گلوکار نے لکھا کہ نواز امریکا سے کراچی آرہا تھا اور اس نے مجھے آخری مسیج کیا تھا کہ میں چند گھنٹوں میں تمہیں ملوں گا۔

انہوں نے لکھا کہ میں اپنے بچپن کے دوست کے پاکستان آنے پر بہت زیادہ پرجوش تھا اور میں نے آج صبح اسے فون کیا تو ایک دوست نے فون اٹھایا اور بتایا کہ نواز انتقال کر گیا ہے۔شہزاد رائے نے لکھا کہ یہ میرے دوست کی وہ آخری تصویر ہے جو اس نے پاکستان آتے ہوئے دبئی ائیرپورٹ سے شیئر کی تھی۔گلوکار نے اپنے دوست کی مغفرت کے لیے دعا بھی کی۔شہزاد رائے کے دوست کے اچانک انتقال پر ٹوئٹر صارفین کی جانب سے تعزیت کا اظہار کیا جارہا ہے۔