بھارت کیخلاف ورلڈ کپ فائنل کھیلنے والے سری لنکن کرکٹر بس ڈرائیور بن گئے

میلبورن (اردو پوائنٹ تازہ ترین اخبار ۔ یکم مارچ 2021ء ) بھارت کے خلاف ورلڈ کپ 2011ء کا فائنل کھیلنے والے سری لنکن بائولر سورج رندیو بس ڈرائیور بن ‏گئے۔ عالمی سطح پر اپنی قومی ٹیم کی نمائندگی کرنے والے سری لنکن پلیئر نے کرکٹ کو خیرباد کہ کر زندگی کا نیا ‏سفر شروع کر دیا۔ آسٹریلیا کے شہر میلبورن میں سٹی بس منصوبے کے سلسلے میں 36 سالہ سورج رندیو سمیت کئی افراد نے ڈرائیو بھرتی ہونے ‏کے لیے درخواست دی جسے منظور کر لیا گیا ہے ۔

اس سے قبل کرکٹ آسٹریلیا نے اپنے کھلاڑیوں کی سپن بائولنگ کی ٹریننگ کے لیے سری لنکن آف سپنر کی خدمات حاصل ‏کی تھیں، وہ کافی عرصے تک آسٹریلوی بلے بازوں کو نیٹ پریکٹس کروا رہے تھے ۔ سورج رندیو سمیت دیگر 2 سری لنکن کھلاڑیوں نے بھی ڈرائیوننگ کے لیے درخواست دی تھی اور ‏انہیں بھی ملازمت مل گئی ہے ۔

(جاری ہے)

سورج رندیو کا کہنا ہے کہ مجھے کرکٹ آسٹریلیا نے بلایا اور خدمات حاصل کیں، اس دوران ملازمت کا جو ‏موقع ملا اسے وہ گنوانا نہیں چاہتے تھے۔

ہندوستان کے خلاف 2011ء کے ورلڈ کپ کے فائنل میں کھیلنے والے سورج رندیو نے 2009ء سے 2016ء کے دوران 12 ٹیسٹ ، 31 ون ڈے اور 7 ٹی ٹونٹی میچوں میں سری لنکا کی نمائندگی کی تھی جس میں انہوں نے بالترتیب 43 ، 36 اور 7 وکٹیں حاصل کیں۔