تمام سرکاری ہسپتالوں میں ڈینگی بخار کی تشخیص اور مفت علاج کی مکمل سہولیات دستیاب ہیں،

کوئی علامت ظاہر ہو نے کی صورت میں قریبی ہسپتال سے رجوع کیا جا سکتا ہے، چیف ایگزیکٹو آفیسر ڈسٹرکٹ ہیلتھ اتھارٹی فیصل آباد

منگل 2 مارچ 2021 12:54

تمام سرکاری ہسپتالوں میں ڈینگی بخار کی تشخیص اور مفت علاج کی مکمل سہولیات ..
فیصل آباد (اُردو پوائنٹ اخبارتازہ ترین - اے پی پی۔ 02 مارچ2021ء) محکمہ صحت نے موسم کی تبدیلی کے باعث ڈینگی بخار سے بچاؤ کیلئے احتیاطی تدابیر پر عملدرآمد کی ہدائت کی ہے اور کہا ہے کہ تمام سرکاری ہسپتالوں میں ڈینگی بخار کی تشخیص اور مفت علاج کی مکمل سہولیات دستیاب ہیں لہٰذا اگر کسی شخص میں ڈینگی بخار سے متعلق کوئی علامت ظاہر ہوں تو فوری طور پر قریبی ہسپتال سے رجوع کیا جا سکتا ہے۔

چیف ایگزیکٹو آفیسر ڈسٹرکٹ ہیلتھ اتھارٹی فیصل آبادڈاکٹر مشتاق احمد سپرا نے ایک ملاقات کے دوران بتا یا کہ ہر بخار ڈینگی نہیں ہوتا جبکہ مذکورہ بخار کے ناقابل علاج ہونے کی اطلاعات میں بھی کوئی صداقت نہیں کیونکہ ڈینگی بخار مکمل طور پر قابل علاج ہے۔ انہوں نے بتایا کہ ڈینگی بخار ایک مخصوص مادہ مچھر کے کاٹنے سے پھیلتا ہے اور یہ مچھر صاف پانی میں پرورش پانے کے علاوہ عموماً طلوع آفتاب اور غروب آفتاب کے وقت حملہ آور ہوتا ہے۔

(جاری ہے)

انہوں نے بتا یا کہ احتیاطی تدابیر پر عملدرآمد کر کے ڈینگی بخار سے بچا جا سکتا ہے۔انہوں نے عوام الناس سے اپیل کی کہ وہ گھروں کے اندر، ارد گرد، چھتوں، پودوں کی کیاریوں، گملوں، پرانے برتنوں اور ٹائروں وغیرہ میں پانی جمع نہ ہونے دیں جبکہ روم کولر کے ناقابل استعمال ہونے پر اس کا پانی مکمل طور پر خشک کر دیا جائے۔انہوں نے کہا کہ مچھروں سے بچاؤ کیلئے کوائل، میٹ،مچھر بھگاؤ لوشن، مچھر دانی کو استعمال میں لایا جائے، ہفتہ میں 2سے 3بار گھر، دفاتر، دکانوں میں صفائی کر کے مچھر مار ادویات کا سپرے کیا جائے اور دروازے ایک گھنٹہ کیلئے بند رکھے جائیں نیز صاف پانی جمع کرنے کے برتن، گڑھے، ڈرم، ٹینکی وغیرہ کو صحیح طور پر ڈھانپ کر رکھا جائے۔

انہوں نے کہا کہ حفاظتی تدابیر پر عملدرآمد عوام کو ڈینگی بخار اور پیچید گیوں سے بچا سکتا ہے کیونکہ پرہیز ہر حال میں علاج سے بہتر ہے۔انہوں نے بتا یا کہ اس ضمن میں جلد فیومیگیشن مہم کا بھی آغاز کیا جارہاہے لہٰذا عوام سے اپیل کی جاتی ہے کہ وہ محکمہ صحت کی ٹیموں سے بھر پور تعاون کریں۔

متعلقہ عنوان :