امارات اور بحرین کیساتھ خصوصی سیکیورٹی انتظامات چاہتے ہیں، اسرائیل

مقبوضہ بیت المقدس (اُردو پوائنٹ اخبارتازہ ترین - این این آئی۔ 04 مارچ2021ء) اسرائیل اپنے خلیجی عرب اتحادیوں کے ساتھ کوئی دفاعی سمجھوتا نہیں بلکہ خصوصی سکیورٹی انتظامات چاہتا ہے۔غیرملکی خبررساں ادارے کے مطابق یہ بات اسرائیلی وزیردفاع بینی گینز نے اسرائیل اور غزہ کے درمیان سرحد پر صحافیوں سے گفتگو کرتے ہوئے کہی ۔انھوں نے اسرائیل کے سرکاری ریڈیو کان کی اس رپورٹ کو مسترد کردیاجس میں اس نے کہا تھا کہ خلیجی عرب ممالک کے ساتھ ایک دفاعی سمجھوتے پر غور کیا جارہا ہے۔

بینی گینز نے کہا کہ اس کے بجائے سکیورٹی تعلقات استوار کیے جائیں گے۔انھوں نے برطانوی خبررساں ایجنسی سے گفتگو کرتے ہوئے کہاکہ میرا نہیں خیال کہ یہ کوئی دفاعی معاہدہ ہوگا بلکہ ہم ہر اس ملک کے ساتھ دفاعی تعلقات استوار کرنا چاہتے ہیں جس سے ہمارے تعلقات استوار ہیں۔

(جاری ہے)

ان کا کہنا تھا کہ اس ضمن میں ہمارے پاس خصوصی سکیورٹی تعلقات کے قیام کا عمل ہے اور اس انتظام میں ہم اپنے تعلقات جاری رکھ سکتے ہیں۔

تاہم انھوں نے ان سکیورٹی انتظامات کی مزید تفصیل بتانے سے گریز کیا ۔انھوں نے یہ بھی اشارہ دیا کہ اسرائیل نے امریکا کی جانب سے متحدہ عرب امارات کو لاک ہیڈ مارٹن کے ساختہ 50 ایف 35 لڑاکا جیٹ فروخت کرنے کی مخالفت نہیں کی تھی۔امریکا کے سابق صدر ڈونلڈ ٹرمپ نے اپنے اقتدار کے آخری ایام میں یو اے ای کو یہ لڑاکا طیارے فروخت کرنے کی منظوری دی تھی لیکن اب صدرجوبائیڈن کی انتظامیہ اس سودے پر نظرثانی کررہی ہے۔بینی گینز سے جب اس ڈیل کے بارے میں سوال کیا گیا تو انھوں نے کہا کہ امریکا کی جانب سے اسرائیل کی فوجی برتری برقرار رکھی جانی چاہیے۔ان کا کہنا تھا کہ یہ لڑاکا طیارے تو پہلے ہی اسرائیلی فضائیہ کے فلیٹ میں شامل ہیں۔