اسپیکر قومی اسمبلی کا لیگی رہنماؤں کے ساتھ بدسلوکی کی تحقیقات کرانے کا اعلان

سیاست میں شائستگی، تحمل، برداشت اور رواداری کا کلچر اپنانا ہوگا، ارکان پارلیمنٹ منتخب عوامی نمائندے ہیں، ان کی عزت سب پرلازم ہے، اسد قیصر

اتوار 7 مارچ 2021 20:20

اسپیکر قومی اسمبلی کا لیگی رہنماؤں کے ساتھ بدسلوکی کی تحقیقات کرانے ..

اسلام آباد (اُردو پوائنٹ اخبارتازہ ترین - این این آئی۔ 07 مارچ2021ء) پاکستان کی ایوان زیریں (قومی اسمبلی) کے اسپیکر اسد قیصر نے گزشتہ روز اسلام آباد میں پارلیمنٹ کے سامنے مسلم لیگ (ن) کے رہنماؤں کے ساتھ پاکستان تحریک انصاف کے کارکنوں کی بدسلوکی کی تحقیقات کرانے کا اعلان کردیا۔اسپیکرقومی اسمبلی نے گزشتہ روز پارلیمان کے سامنے ناخوشگوار واقعے پر افسوس کا اظہار کیا اور کہا کہ ایسے واقعات افسوسناک اور قابل مذمت ہیں۔

اپنے بیان میں انہوںنے کہاکہ سیاست میں شائستگی، تحمل، برداشت اور رواداری کا کلچر اپنانا ہوگا، ارکان پارلیمنٹ منتخب عوامی نمائندے ہیں، ان کی عزت سب پرلازم ہے، ہمیں سیاست میں برداشت، تحمل اور بردباری کا مظاہرہ کرنا ہوگا۔اسپیکر قومی اسمبلی نے اعلان کیا کہ واقعے کی مکمل انکوائری کروائی جائے گی۔

(جاری ہے)

انہوں نے کہا کہ اس طرح کے واقعات کے تدارک کیلئے سیاسی قیادت کو اپنا کردار ادا کرنا چاہیے۔

خیال رہے کہ گزشتہ روز مسلم لیگ (ن) کے رہنما شاہد خاقان عباسی، مریم اورنگزیب، احسن اقبال اور دیگر اسلام آباد میں میڈیا سے گفتگو کررہے تھے کہ اس دوران تحریک انصاف کے کارکنان کی بڑی تعداد ریڈ زون میں گھس گئی۔پی ٹی آئی کارکنان اور (ن) لیگ کے رہنماؤں کے درمیان ہاتھا پائی بھی ہوئی اور اس دوران مریم اورنگزیب کو دھکے دیے گئے جس پر لیگی رہنما مصدق ملک اور شاہد خاقان عباسی بھی پی ٹی آئی کارکنان نے دست و گریباں ہوگئے جب کہ چند پولیس اہلکار خاموش تماشائی بنے رہے۔