شاہنواز دھانی، محمد وسیم کو دورہ جنوبی افریقہ،زمبابوے کیلئے قومی سکواڈ میں شامل کیے جانے کا امکان

لاہور (اردو پوائنٹ تازہ ترین اخبار ۔ 10 مارچ 2021ء ) ابھرتے ہوئے فاسٹ بائولرز شاہنواز دہانی اور محمد وسیم کے دورہ جنوبی افریقہ اور زمبابوے کے لئے قومی ٹیم کا حصہ بننے کا امکان ہے ۔ جنوبی افریقہ کے خلاف 3 ون ڈے انٹرنیشنل اور 4 ٹی ٹوئنٹی انٹرنیشنل میچوں کے لئے قومی ٹیم کے اسکواڈ کا اعلان جلد ہی متوقع ہے۔چیف سلیکٹر محمد وسیم نے سکواڈ سلیکشن کے حوالے سے قومی سلیکشن کمیٹی کے ممبروں سے مشورہ کیا ہے اور امکان ہے کہ جنوبی افریقہ اور زمبابوے دونوں ٹیموں کے لئے سکواڈ کا اعلان ایک ساتھ کیا جائے گا۔

کمیٹی نے پاکستان سپر لیگ (پی ایس ایل) کے چھٹے ایڈیشن میں کھیلے جانے والے 14 میچوں میں کھلاڑیوں کی کارکردگی پر روشنی ڈالی اور وہ ٹی ٹونٹی سیریز کے لئے ان پر غور کریں گے۔

(جاری ہے)

پی ایس ایل 6 میں ملتان سلطانز اور اسلام آباد یونائیٹڈ کی نمائندگی کرنے والے فاسٹ بائولر شاہنواز دہانی اور وسیم نے رواں سال کے ٹورنامنٹ کے ایڈیشن میں کھیلے گئے 4 میچوں میں 12 وکٹیں حاصل کیں۔

سینئر آل راؤنڈر محمد حفیظ اور عماد وسیم کی بھی قومی ٹیم میں واپسی متوقع ہے۔ دریں اثناء پاکستان کرکٹ بورڈ (پی سی بی) کے چیف ایگزیکٹو وسیم خان نے کپتان بابر اعظم اور ہیڈ کوچ مصباح الحق سے جنوبی افریقہ کے دورے کے لئے حکمت عملی تیار کرنے کے لئے الگ الگ ملاقات کی۔ میٹنگ میں دورے کے لئے کوویڈ 19 ایس او پیز اور کھلاڑیوں کے لئے بائیو سیفٹی بلبل کے انتظامات پر تبادلہ خیال کیا گیا۔